იუსტიციის მინისტრის, რატი ბრეგაძის განცხადებას მიხეილ სააკაშვილის ჯანმრთელობის მდგომარეობასთან დაკავშირებით, ჟურნალისტებთან კომენტარში კონკრეტული შეფასებებით ეხმაურება საქართველოს მე-3 პრეზიდენტის დედა, გიული ალასანია. მისი განმარტებებით იუსტიციის მინისტრს არ აქვს შესაბამისი ინფორმაცია:
,,არ ვიცი, ბატონ რატის ვისგან აქვს ეს ინფორმაცია. იმიტომ, რომ მე ყოველ ჯერზე გამოვდივარ და რაც მთავარია – მე მოწმე ვარ ყველაფრის. რა “თვითდაზიანებაც” ეს არის – ძალიან კარგად ვხედავ.
რეკომენდაცია არის, უნდა ჭამოს, მიიღოს კალორიები. რომ ვერ იღებს – რა ვქნათ?! აი, ეს არის მისი ავადმყოფობა. არ თანხმდება [პარენტერალურ კვებას], რადგან ყველა მხრიდან ესმის, რომ საავადმყოფოს არ აქვს ამის გამოცდილება.
მადლობა ღმერთს, რომ გვყავს პატიოსანი ექიმები. ყველა ექსპერტი, მე ამის უკვე მერამდენედ გამეორება მიხდება, ვინც იყო ჩართული იმ კონსილიუმში, ყველა ერთი და იგივეს ამბობს. მათ აღმოაჩნდათ პროფესიული კეთილსინდისიერება და მივიღეთ ის დასკვნები, რომლებიც შეესაბამება რეალობას.
ხოლო ხელისუფლების მიზანია, რომ სააკაშვილი არსად, არსად აღარ არსებობდეს”, – განაცხადა გიული ალასანიამ.
ავტორი
ნინი ხიჯაკაძე
