საქართველოს, ფიგურულ ციგურაობაში, ევროპის ჩემპიონი ჰყავს. წარმატებული იყო საქართველოს წარმომადგენლის გამოსვლა ფინეთში მიმდინარე კონტინენტის პირველობაზე, სადაც ანასტასია გუბანოვამ ოქროს მედალი მოიპოვა. ემოციური იყო მისი ინტერვიუ გამარჯვების შემდეგ:
,,ჯერ ისევ შოკში და ვერ მივხვდი რა მოხდა, თუმცა შრომა დამიფასდა. სრიალის წინ ძალიან ვნერვიულობდი, ფსიქოლოგიურად რთული იყო. როდესაც გამოსვლა დავასრულე ემოციები ვეღარ შევიკავე.
მიხარია, რომ საკუთარ თავს ვძლიე. არ ვფიქრობდი მოვიგე თუ არა. ვერ ვიტყვი, რომ პროგრამა კარგად შევასრულე. ელემენტებს დიდ ყურადღებას ვაქცევდი. დღეს ჩემი სრიალი იდეალური და ბოლომდე სუფთა არ იყო.
რაც შეეხება საქართველოს, ამ ქვეყანას, მის კულტურას ვიცნობ და დიდ პატივს ვცემ. წინა შეკრებაზე თბილისშიც ვიყავი და ქართული სამზარეულოთი აღფრთოვანებული დავრჩი. ძალიან ბედნიერი ვარ, რომ ეს გამარჯვება საქართველოს მოვუტანე“, – განაცხადა ანასტასია გუბანოვამ.
კულტურისა და სპორტის სამინისტროს ინფორმაცია: ქართველი ფიგურული მოციგურავე ანასტასია გუბანოვა ფინეთის ქალაქ ესპოში გამართული ევროპის ჩემპიონატის გამარჯვებულია. ახალგაზრდა სპორტსმენმა ჯერ მოკლე პროგრამაში მოახერხა მცირე ოქროს მედლის მოპოვება, შემდეგკი თავისუფალ პროგრამაში 130.10 ქულა მოაგროვა და 199.91 ქულით ევროპის ჩემპიონი გახდა. აღსანიშნავია, რომ ანასტასია გუბანოვამ ქართული ფიგურული ციგურაობის ისტორიაში პირველად მოიპოვა ევროპის ჩემპიონის ტიტული.
ავტორი
ნინი ხიჯაკაძე
