“შიმშილობა არ არის ის ფორმა, რომლითაც უნდა ხდებოდეს ზეწოლა, პირიქით – ამით ხდება მიხეილ სააკაშვილის წახალისება, რომ მან რაც შეიძლება მეტად დაიმძიმოს საკუთარი მდგომარეობა” – შალვა პაპუაშვილი

საქართველოს პარლამენტის თავმჯდომარემ, შალვა პაპუაშვილმა მოშიმშილე დეპუტატები მოინახულა, რის შემდეგაც ჟურნალისტებთან პოლიტიკური შეფასება გააკეთა ,,ნაციონალური მოძრაობის” წევრების მხრიდან პროტესტის ამ ფორმასთან დაკავშირებით:

,,შიმშილობა არ არის ის ფორმა, რომლითაც უნდა ხდებოდეს ზეწოლა, პირიქით – ამით ხდება მიხეილ სააკაშვილის წახალისება, რომ მან კიდევ უფრო მეტად არ ითანამშრომლოს ექიმებთან და შეეცადოს, რაც შეიძლება მეტად დაიმძიმოს საკუთარი მდგომარეობა.

მას სწორედ ასეთი ქმედებებით/განცხადებით, ექმნება იმედი და ილუზია, რომ აი, ცოტაც – 1 დღეც, 1 კვირაც და მისი საკითხი გადაწყდება ისე, როგორც მას უნდა.

ეს არის მიხეილ სააკაშვილის და მისი ე.წ. მეგობრების ინტერესი, რომ რაც შეიძლება დაამძიმონ ეს ადამიანი. იქნებ რამენაირად სასამართლოს შეუქმნან წინაპირობა, რომ მიიღოს გადაწყვეტილება სასჯელის გადავადებასთან დაკავშირებით“, – განაცხადა შალვა პაპუაშვილმა

ინფორმაციისთვის: მიხეილ სააკაშვილის უცხოეთში სამკურნალოდ მოთხოვნის მიზნით, გუშინ პარლამენტში შიმშილობა დაიწყო ფრაქცია “ერთიანი ნაციონალური მოძრაობა – ძალა ერთობაშიას” სამმა წევრმა – დავით კირკიტაძემ, ანა წითლიძემ და აბდულა ისმაილოვმა, ხოლო დღეს მათ თემურ ჯანაშია შეურთდა.