ფრაქცია ,,ერთიანი ნაციონალური მოძრაობა – ძალა ერთობაშიას” წევრმა დავით კირკიტაძემ თანაგუნდელებთან ერთად პარლამენტში საგანგებო განცხადება გააკეთა, სადაც შიმშილობის დაწყება დაანონსა:
,,საქართველოს ხელისუფლების მიერ გუშინ გავრცელებულ გუშინდელ კადრებში ყველა ვიხილეთ, თუ რას აკეთებენ რომ ქვეყნის მე-3 პრეზიდენტი მიიყვანონ სიკვდილამდე რის გამოც, ბუნებრივია, გულგრილი არ დარჩენილა არცერთი მოქალაქე და ჩვენ, საქართველოს პრეზიდენტის მეგობრები და თანამებრძოლები, ამ ყველაფერს არ შევხვდებით გულგრილად!
დღეს, მე და ჩემმა მეგობრებმა, მიუხედავად ფრაქციაში არსებული აზრთა სხვადასხვაობისა, მივიღეთ გადაწყვეტილება, რომ მიხეილ სააკაშვილის გადაყვანამდე იმ ქვეყანაში, სადაც მისი ჯანმრთელობა იქნება უზრუნველყოფილი, ვაცხადებთ შიმშილობას.
ამ პოლიტიკურ აქტთან დაკავშირებით, იყო აზრთა სხვადასხვაობა ფრაქციის შიგნით, მაგრამ ჩვენ მივიღეთ ეს გადაწყვეტილება და ღრმად ვარ დარწმუნებული, რომ ეს პოლიტიკური აქტი იქნება მზარდი, იქნება პარლამენტის კედლებში და პარლამენტის კედლებს გარეთაც!
მე ღრმად ვარ დარწმუნებული, ჩვენს საზოგადოებას საკმარისზე მეტად აქვს შერჩენილი ადამიანობა, ჰუმანიზმი და ჩვენ ერთად არ უნდა დავუშვათ ჩვენ ქვეყანაში საქართველოს მე-3 პრეზიდენტის სიკვდილი და არ უნდა გავხდეთ თანამონაწილენი ამ აქტისა უკვე მეორედ. ამისთვის ჩვენ მზად ვართ გავაკეთოთ ყველაფერი და კიდევ ერთხელ ვიმეორებ, ეს პოლიტიკური აქტი იქნება აქაც და პარლამენტის კედლებს გარეთაც“, – განაცხადა დავით კირკიტაძემ.
ინფორმაციისთვის: მიხეილ სააკასვილის უცხოეთში სამკურნალოდ მოთხოვნის მიზნით პარლამენტში შიმშილობა დაიწყო “ერთიანი ნაციონალური მოძრაობა – ძალა ერთობაშიას” სამმა წევრმა – დავით კირკიტაძემ, ანა წითლიძემ და აბდულა ისმაილოვმა.