“საზოგადოება ერთხელ და სამუდამოდ დარწმუნდეს, რომ ძალიან მძიმეა მიხეილ სააკაშვილის მდგომარეობა” – გიორგი სააკაშვილი

საქართველოს მე-3 პრეზიდენტის ჯანმრთელობის მძიმე მდგომარეობაზე ჟურნალისტებთან კომენტარს აკეთებს მიხეილ სააკაშვილის ძმა გიორგი სააკაშვილი. მისი განცხადებით, დღევანდელ სასამართლო პროცესზე შესაძლოა დაესწროს თავად ყოფილი პრეზიდენტი, თუ ჯანმრთელობის მდგომარეობა ხელს შეუწყობს:

,,ტოქსიკოლოგიური დასკვნა ნამდვილად მზად არის. მოდით, დაველოდოთ – თვითონ ექიმებმა გააკეთონ განცხადებები.

რაც შეეხება შუამდგომლობას – ძალიან მოკლე ხნის მანძილზე მოხდება სასამართლოში შეტანა, ვინაიდან დრო აღარ ითმენს. მართლა ძალიან მძიმე მდგომარეობაა.

დღესაც, მოგეხსენებათ, სასამართლო პროცესია. მიშას სურვილი აქვს, რომ დაესწროს, მაგრამ ნამდვილად არ ვიცი შეძლებს თუ არა, ვინაიდან მე ჩემი თვალებით ვხედავ, როგორი რთულია მისი მდგომარეობა. გადაადგილება უჭირს, ძირითადად წევს.

საზოგადოება ერთხელ და სამუდამოდ დარწმუნდეს, რომ იძახიან ეს ფეიკია, ჩვეულებრივად არის, როგორც ყველა პატიმარი – არა! – ძალიან მძიმეა მისი მდგომარეობა“, – განაცხადა გიორგი სააკაშვილმა.

ავტორი
ნინი ხიჯაკაძე