“მე მას არ ვენდობი, რადგან მან ბევრჯერ გადაგვაგდო, სიტყვა გატეხა და გადამგდებ პოლიტიკოსს არ ვენდობი!” – გიორგი მუმლაძე ნიკა მელიაზე

,,მოძრაობა საქართველოსთვის” წევრი გიორგი მუმლაძე საგანგებო ბრიფინგზე განცხადებას აკეთებს ,,ერთიანი ნაციონალური მოძრაობის” შიგნით დაგეგმილ შიდაპარტიულ არჩევნებთან დაკავშირებით. სამოქალაქო აქტივისტი მწვავედ აკრიტიკებს პარტიის თავმჯდომარეს, ნიკა მელიას და უნდობლობას უცხადებს მას:

,,დღეს ისევ თავზე გვაზის რუსეთის პოროტების იმპერია. რუსი ოლიგარქი, ბიძინა ივანიშვილი და რუსული რეჟიმი სულს გვიხუთავს, ჩვენს მომავალს ყოველდღიურად კლავს, ამიტომ აუცილებელია მისი გამარცხება, რისთვისაც ერთიან ნაციონალურ მოძრაობაში” უნდა განხორციელდეს ცვლილებები, შეიცვალოს ნიკა მელია და არსებული ხელმძღვანელობა, რომელმაც ეს პარტია თავიდან ბოლომდე მიიყვანა უძრაობამდე და ჩამოშალა.

ჩვენი მიზანია, რომ ეს პარტია, ეს უზარმაზარი რესურსი გახდეს აქტიური, გახდეს ფლაგმანი ქუჩის პროტესტის მთელი საქართველოს მასშტაბით. უშუალოდ შევაწუხოთ რუსული რეჟიმი ყველგან.

გადადგეს ნიკა მელია თავმჯდომარეობის თანამდებობიდან, რომ მან თავისი უფლება-მოსილებები არ გამოიყენოს ბოროტად. მე მას არ ვენდობი, რადგან მან ბევრჯერ, მე ამას ვამბობ, როგორც ,,ნაციონალური მოძრაობის” მხარდამჭერი, გადაგვაგდო, სიტყვა გატეხა და გადამგდებ პოლიტიკოსს არ ვენდობი.

ბიძინა ივანიშვილის ასეთი გაჯეჯილება, საქართველოში მჩაგვრელი ფეოდალიზმის დამყარება არის პირდაპირ უუნარო და უსუსური ოპოზიციის ბრალი“, – განაცხადა გიორგი მუმლაძემ.

ინფორმაციისთვის: ,,მოძრაობა საქართველოსთვის” წევრი გიორგი მუმლაძე მონაწილეობას იღებს ,,ერთიანი ნაციონალური მოძრაობის” თავმჯდომარეობის არჩევნებში.

ავტორი
ნინი ხიჯაკაძე