“ეს არის ჯორჯ ორუელისეული ტიპიური ნიუსფიკი, როდესაც ჩვენ გვთავაზობენ, რომ მეცენატს ვუწოდოთ ოლიგარქი, ქართული ჯარის გაქურდვით გაოლიგარქებულ ადამიანს – მედია მენეჯერი, ქართველი ხალხის ჩაგვრის სისტემის შემქმნელ სააკაშვილს – დემოკრატიის შუქურა” – შალვა პაპუაშვილი

საქართველოს პარლამენტის თავმჯდომარე შალვა პაპუაშვილი ჟურნალისტებთან კომენტარში მწვავე შეფასებას აკეთებს ევროპარლამენტის რეზოლუციაზე, რომელშიც, ევროპარლამენტის საგარეო ურთიერთობათა კომიტეტის სხდომაზე, გარკვეული ცვლილებების შეტანა განხორციელდა:

,,ჩვენ და ჩვენმა მოსახლეობამ, პრინციპში, პირდაპირ ეთერში იხილა, რაც მოხდა. იყო მომხსენებლის მიერ მომზადებული რეზოლუციის პროექტი, რომელიც იყო დაბალანსებული და იმ ადამიანის მიერ შედგენილი, რომლებიც ამ საკითხებით იყო დაკავებული.

ვნახეთ, თუ როგორ მოხდა ამ რეზოლუციაზე თავდასხმა, შესწორებების ინიცირება და ა.შ. საჭირო გახდა კომპრომისები იმისთვის, რომ გარკვეული ტექსტი, საბოლოო ჯამში, შედგენილიყო.

მე ვიტყოდი, რომ ეს არის არაჯანსაღი კომპრომისი, სამწუხაროდ, რაც ჩვენ ვიხილეთ იმ პროექტის საბოლოო ვერსიაში, რომელიც კომიტეტზე იქნა დამტკიცებული.

საბოლოო ჯამში, თუ ჩავხედავთ ამ ტექსტს და იმ ნაწილებს, რომლებიც შესწორების სახით აღმოჩნდა ამ ტექსტში, ჩვენ ვხედავთ, რომ ეს არის ჯორჯ ორუელისეული ტიპიური ნიუსფიკი, როდესაც ჩვენ გვთავაზობენ, რომ მეცენატს ვუწოდოთ ოლიგარქი, ქართული ჯარის გაქურდვით გაოლიგარქებულ ადამიანს – მედია მენეჯერი, ქართველი ხალხის ჩაგვრის სისტემის შემქმნელ სააკაშვილს – დემოკრატიის შუქურა და ა.შ.

ნიუსფიქი – ამოტრიალებული რეალობა და სიყალბე, რომლის აღიარებასაც გვთავაზობენ. რა თქმა უნდა, ჩვენ არ ვაპირებთ ასეთი სიყალბეების აღიარებას. ასეთი ამობრუნებული რეალობის შემქმნელი მხოლოდ ერთი სახელმწიფო მახსენდება – ეს არის რუსეთი. სამწუხაროა, როდესაც ხედავ ევროპელ პოლიტიკოსებს, რომლებიც რუსული პროპაგანდისტული მეთოდებით მუშაობენ.

ჩვენი დამოკიდებულება არის ძალიან მარტივი და პირდაპირი: თეთრი ვერ გახდება შავი, შავი ვერ იქცევა თეთრად. მიუხედავად იმისა, თუ ვის რა აღქმების შექმნა სურს. ამიტომ სიმართლე ყოველთვის დარჩება სიმართლედ, ტყუილი ყოველთვის იქნება ტყუილი!“, – განაცხადა შალვა პაპუაშვილმა.