იურიდიულ საკითხთა კომიტეტის სხდომაზე ერთმანეთს, უკვე მერამდენედ, დაუპირისპირდნენ ეკა ბესელია და ვანო ზარდიაშვილი, ოღონდ, თუ ადრე კონფლიქტი სიტყვიერს არ გასცდენია, დღეს ფიზიკურ დაპირისპირებაში გადაიზარდა და ეკა ბესელიამ ხელი გაარტყა ვანო ზარდიაშვილს.
დაპირისპირება მოჰყვა გედევან ფოფხაძის მიერ მორალზე ხაზგასმამ, რასაც ვანო ზარდიაშვილმა რეპლიკით “ბესელიას მორალი” ახსენა, ამან კი ეკა ბესელიას სერიოზული აღშფოთება გამოიწვია.
“რა ბესელიას მორალი, რაშია საქმე? რა ბესელიას მორალი? რომელი ბესელიას მორალი?” – ამ სიტყვებით მიუახლოვდა ეკა ბესელია ვანო ზარდიაშვილს და შეძახილის თანხლებით “შენ ნაძირალა”, სახეში გაარტყა ხელი.
მომხდარ ინციდენტს მომენტალურად გამოეხმაურა სხდომის წამყვანი დავით მათიკაშვილი, რომელმაც მოითხოვა ეკა ბესელიას დარბაზიდან გაყვანა, რამაც უფრო აღაშფოთა ბესელია:
“გაბედეთ აბა, ვის დაატოვებინებთ? თქვენ თავზე ნუ გაგივიდათ!
ვის უბედავ? ადეიშვილის მონა, შენ მისი ღამის მორიგევ! ეხლა აქედან გამასწარი! შენ ნაძირალა, შენ ადეიშვილის ხელის ბიჭო. ნარკოტესტის გამო რომ გამოგაბუნძულეს“, – მიმართა ვანო ზარდიაშვილს და “ქართული ოცნების” დეპუტატებს ეკა ბესელიამ.
აღსანიშნავია, რომ ადრეც მწვავე იყო დაპირისპირება ამ ორ დეპუტატს, “ქართული ოცნების” ყოფილ და მოქმედ წევრს შორის.
“შენ ხელებს ფულის სუნი ასდის” – ზარდიაშვილის ამ მიმართვის პასუხად, ბესელია ზონდერად მოიხსენიებს მას.
ვირთხა, ჩამშვები, ნებისმიერი ეპითეტით, რომლითაც შეგვიძლია იმ შინაარსით შევავსოთ ეკა ბესელია, იგი ყველაფრის ღირსია – ასეთი ეპითეტებიც გამოუყენებია ვანო ზარდიაშვილს…
