“დღეს სრულდება საქართველოს საპარლამენტო დელეგაციის ვიზიტი რუანდაში, მსოფლიო საპარლამენტო კავშირის ყოველწლიურ ასამბლეაზე. ჩვენ საკმაოდ პროდუქტიული ვიზიტი გამოგვივიდა იქიდან გამომდინარე, რომ 20-ზე მეტი ქვეყნის დელეგაციას შევხვდით. დელეგაციები წარმოდგენილი იყვნენ პარლამენტის თავმჯდომარეების ან ვიცე-სპიკერების დონეზე. სასიხარულოა, რომ საქართველოს ტერიტორიულ მთლიანობას საკმაოდ დიდი მხარდაჭერა აქვს“, – ამის შესახებ განაცხადა პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ, რომელიც რუანდაში მიმდინარე საპარლამენტთაშორისო კავშირის 145-ე ასამბლეის ფარგლებში საქართველოს საპარლამენტო დელეგაციასთან ერთად, ორმხრივ შეხვედრებს მართავს.
ნიკოლოზ სამხარაძის განცხადებით, შეხვედრებზე განხილვის თემას რუსეთის აგრესია საქართველოს წინააღმდეგ, ოკუპირებული ტერიტორიებზე არსებული ვითარება და საერთაშორისო ფორუმებზე საქართველოს ტერიტორიული მთლიანობის მხარდაჭერა წარმოადგენდა.
“შეხვედრაზე გვქონდა დეტალური და სიღრმისეული დისკუსია. ვისაუბრეთ აფრიკის კონტიგენტის, სამხრეთ ამერიკული და წყნარი ოკეანის ქვეყნების წარმომადგენლებთან, ვისთანაც არ გვაქვს ხშირი კავშირი. სასიხარულოა, რომ ამ ქვეყნებში საკმაოდ დიდი მხარდაჭერა აქვს საქართველოს ტერიტორიულ მთლიანობას. ყველა ქვეყანამ თქვა, რომ მათი პოზიცია არაღიარების პოლიტიკის თაობაზე არ გადაიხედება, თუმცა ასევე იყო გამოთქმული ერთგვარი თხოვნა იმის შესახებ, რომ მათ რაც შეიძლება ხშირად მოვაწოდოთ ინფორმაცია იმ საკითხებზე, რომელიც ჩვენს ოკუპირებულ ტერიტორიებზე არსებულ მდგომარეობას ეხება. ამიტომ, ამ მხრივ ჩვენი მუშაობა მხოლოდ ამ სესიით არ შემოიფარგლება და ამ ქვეყნებთან თანამშრომლობას ინტენსიურად გავაგრძელებთ“, – განაცხადა საგარეო ურთიერთობათა კომიტეტის თავმჯდომარემ.
საქართველოს საპარლამენტო დელეგაციის შემადგენლობაში პარლამენტის თავმჯდომარესთან ერთად, საგარეო ურთიერთობათა კომიტეტის თავმჯდომარე ნიკოლოზ სამხარაძე, გარემოს დაცვისა და ბუნებრივი რესურსების კომიტეტის თავმჯდომარის პირველი მოადგილე ხატია წილოსანი და საპარლამენტო პოლიტიკური ჯგუფი „გირჩის“ წევრი ალექსანდრე რაქვიაშვილი შედიან.
საქართველოს საპარლამენტო დელეგაცია ოფიციალურ ვიზიტს, რუანდაში საპარლამენტთაშორისო კავშირის (IPU) 145-ე ასამბლეის ფარგლებში, დღეს დაასრულებს.
ინფორმაციას პარლამანტის საზოგადოებასთან ურთიერთობისა და ინფორმაციის დეპარტამენტი ავრცელებს
