შინაგან საქმეთა სამინისტრომ ოფიციალურად გაავრცელა ინფორმაცია ქუთაისში, ”საქართველოს ბანკის” ერთ-ერთ ფილიალზე თავდამსხმელი და მძევლების ამყვანი პირი დააკავეს:
“შინაგან საქმეთა სამინისტრომ ქუთაისში ”საქართველოს ბანკის” ერთ-ერთ ფილიალზე თავდასხმის, ტერორისტული აქტის, ტერორისტული მიზნით მძევლად ხელში ჩაგდების და საბრძოლო მასალის მართლსაწინააღმდეგო შეძენა-შენახვა-ტარების ბრალდებით 1985 წელს დაბადებული გ.ნ. დააკავა.
ოპერატიულ-საგამოძიებო მოქმედებებით დადგინდა, რომ შეიარაღებული პირი ქუთაისში, შოთა რუსთაველის გამზირზე მდებარე “საქართველოს ბანკის” ფილიალში შეიჭრა და დიდი ოდენობის თანხის დაუფლების მიზნით 14 პირი მძევლად აიყვანა.
შინაგან საქმეთა სამინისტრომ მძევლად აყვანილი ყველა ადამიანი ეტაპობრივად გაათავისუფლა, რის შემდეგაც სამართალდამცველებმა თავდამსხმელი ბრალდებულის სახით ადგილზე დააკავეს. მომხდარის შედეგად არავინ დაშავებულა.
მომხდარ ფაქტზე გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს“, – ნათქვამია გავრცელებულ ინფორმაციაში.
ინფორმაციისთვის: შს სამინისტროს პრესსამსახურის უფროსის ქეთი კოვზიაშვილის განცხადებით სპეცოპერაცია წარმატებით დასრულდა და მძევლები გათავისუფლებული არიან.
შეგახსენებთ, რომ შეიარაღებული პირი, გავრცელებული ინფორმაციით იგი წყალტუბოში მცხოვრები გრიგოლ ნარსიაა, ”საქართველოს ბანკის” ერთ-ერთ ფილიალში, დღის პირველ ნახევარში შეიჭრა. თავდამსხმელს თავიდან 14 მძევალი ჰყავდა, შემდეგ 2 მძევალი გაუშვა. მისი მოთხოვნა იყო 2 მილიონი დოლარი (შემდეგ შეამცირა15. მილიონ დოლარამდე), მიკროავტობუსი, ვერტმფრენი, რუსულ დროშა, ანკესი.
