საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე მორიგ კრიტიკულ შეფასებებს აკეთებს ოპოზიციის მიმართ. საპარლამენტო უმრავლესობის წევრს მიაჩნია, რომ ოპოზიციას 12-პუნქტიანი რეკომენდაციის შესრულების დაინტერესება არ აქვს:
“საუბედუროდ დღეს გვყავს ოპოზიცია, მათ შორის, არც თუ ისე მცირედ წარმოდგენილი პარლამენტში, რომლისთვისაც პრიორიტეტები არის იმგვარად ფორმულირებული და ჩამოყალიბებული, რომ მათ მაინცდამაინც ჯანსაღი ინტერესები, რა თქმა უნდა, არ გააჩნიათ.
მათთვის საქართველოს ინტერესი, საერთო საზოგადო საქმის ინტერესი, სამწუხაროდ, არ აქვთ პირველ ადგილზე დაყენებული. ვიწროპარტიული და მერკანტილური ინტერესია მათი ქმედებებისა და დღის წესრიგის ძირითადი განმაპირობებელი.
საუბედუროდ, ასეთია მათი ბუნება და ამიტომაც არის, რომ მათთვის მნიშვნელოვანია არა 12 პუნქტის შესრულება და საქართველოს ევროინტეგრაციის მიმართულებით შემდგომი ნაბიჯის გადადგმა, არამედ მათი ამოცანაა, რომ რამენაირად ამას ხელი შეუშალონ.
ოპოზიციას არ უნდა, რომ “ქართული ოცნების” მმართველობის პერიოდში საქართველოს ჰქონდეს ისეთი წარმატება, როგორიც არის მომდევნო ნაბიჯების გადადგმა ევროინტეგრაციის მიმართულებით,” – აცხადებს მიხეილ სარჯველაძე.
