ინტერნეტგამოცემა “ტაბულას” დამფუძნებელი, თამარ ჩერგოლეიშვილი, სოციალურ ქსელში გამოქვეყნებულ პოსტში, ვადამდელ არჩევნებსა და ხელისუფლების ცვლილების აუცილებლობაზე წერს:
“ვადამდელზე:
ეს რეჟიმი არის შესაცვლელი. ამოცანა არის რეჟიმის შეცვლა. შესაცვლელია რაც შეიძლება მალე.
შესაცვლელია ყველაზე ნაკლები ზიანით და დემოკრატიული მთავრობით ისე, რომ თავისუფალ სამყაროს დავუახლოვდეთ.
ამას სჭირდება ერთი რამ – ძალიან ბევრი ხალხი ქუჩაში იმდენ ხანს, რამდენ ხანსაც შედეგს დასჭირდება.
ბევრი ხალხი სჭირდება ვადამდელსაც და არავადამდელსაც იმიტომ, რომ შემდეგი არჩევნები სასურველია სუს-ის კონტროლის გარეშე ჩატარდეს და ეს ბევრმა ხალხმა შეიძლება აიძულოს.
ანუ ივანიშვილი არჩევნების გზით უნდა წავიდეს, ესაა ქვეყნისთვის საუკეთესო გამოსავალი, მაგრამ არჩევნები მან არჩევნებამდე უნდა წააგოს.
ამას სჭირდება, რომ ყველა პარტიას და სამოქალაქო ჯგუფს ჰყავდეს აქტიური მხარდამჭერები, რომლებიც ლიდერებს ენდობიან და მათთან ერთად იბრძვიან ქუჩაში.
სანამ ეს არ იქნება, მანამდე ვადამდელის ყვირილია სისულელე, თორემ ვადამდელი სწორი გზაა, თუ ვიგებთ – რაც მალე, მით უკეთესი.
ოღონდ უნდა ვიგებდეთ! და ეს ქუჩამ უნდა აჩვენოს – ქუჩაში ხალხმა.
ხალხმა რომ აჩვენოს, ამისთვის ამ ხალხმა საკუთარი თავი უნდა დაინახოს ალტერნატიულ დღის წესრიგში.
სახლი შენდება საძირკვლიდან.
სახურავიდან სახლი არ შენდება.
ამოცანა რეჟიმის შეცვლაა, ვადამდელი მხოლოდ გზაა და ამ გზას მაშინ უნდა დაადგე როცა იცი, რომ ცვლი და 100 ათასი კაცი დგას ქუჩაში,” – წერს ფეისბუქის პირად გვერდზე თამარ ჩერგოლეიშვილი.
