“ქალაქის მერს ქალაქის მართვა და მოსახლეობის პრობლემების მოგვარება, მხოლოდ ქალაქში სელფის ჯოხით სიარული და ჟურნალისტებთან კეკლუცი ჰგონია” – გიორგი ვაშაძე

პოლიტიკური პლატფორმა “სტრატეგია აღმაშენებლის” თავმჯდომარე, პარლამენტის დეპუტატი გიორგი ვაშაძე დედაქალაქის მერს, კახა კალაძეს თბილისში არსებული პრობლემების გამო მწვავედ აკრიტიკებს:

“თბილისის მერი ტელევიზიასთან და ჟურნალისტებთან კეკლუცის ნაცვლად, რომ თითქოს დიდი აღმშენებლობა მიმდინარეობს ქალაქში და გული შესტკივა ქალაქის მაცხოვრებლების პრობლემებზე, უმჯობესია იმ საკითხით დაინტერესდეს, რომ თვეობით გადათხრილია ქუჩები და ნახოს რა მდგომარეობაშია იქ არსებული მტვერისა და ბუღის გამო მოსახლეობა, ან რა ხდება უკანონო, უკონტროლო მშენებლობებთან დაკავშირებით, ლამის ყველა სკვერში და პარკში მრავალსართულიან კორპუსებს რომ დგამენ.

ეს არის ქალაქის მართვა? ვერავინ დამარწმუნებს, რომ თითქმის ერთი წელი სჭირდება ერთი ქუჩის პატარა მინაკვეთის რეაბილიტაციას. რა ხდება თუნდაც მელიქიშვილის ქუჩასთან დაკავშირებით, თვეობით გადათხრილია, რაც აფერხებს ქალაქში გადაადგილებას.
გაესაუბროს იქ მცხოვრებ მოსახლეობას, რა პირობებში უწევთ ცხოვრება.

სამწუხაროა, რომ ქალაქის მერს ქალაქის მართვა და მოსახლეობის პრობლემების მოგვარება, მხოლოდ ქალაქში სელფის ჯოხით სიარული და ჟურნალისტებთან კეკლუცი ჰგონია”, – აცხადებს გიორგი ვაშაძე.

ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს