დედაქალაქის მერის, კახა კალაძის განცხადებით, წელს თბილისობის დღესასწაული 1-2 ოქტომბერს ჩატარდება. ამის შესახებ მან თბილისის მუნიციპალიტეტის მთავრობის სხდომაზე ისაუბრა.
მისი თქმით, ტრადიციული დღესასწაული, რომელიც ბოლო წლებში პანდემიის გამო არ ჩატარებულა, წელს განსაკუთრებით მასშტაბური იქნება.
„ეს დღესასწაული, რომელიც ჩვენი ქალაქის მრავალწლიანი ტრადიცია და მისი ცხოვრების ნაწილია, წელს ისევ გაიმართება. იყო გარკვეული შეფერხება პანდემიის გამო, თუმცა წელს გვაქვს შესაძლებლობა, ოქტომბრის პირველ უქმეებზე, 1-2 ოქტომბერს ჩავატაროთ შესაბამისი ღონისძიებები. „თბილისობა“ იქნება ბევრად მასშტაბური და დატვირთული უამრავი სადღესასწაულო პროგრამით.
„თბილისობას“ ტრადიციულად უმასპინძლებს რიყე და ლეღვთახევი. ასევე, ღონისძიებები გაიმართება ორბელიანისა და გუდიაშვილის მოედნებზე. ველოდებით დელეგაციებს თბილისის მეგობარი და პარტნიორი ქალაქებიდან. ყველა მოუთმენლად ელოდება ამ დღესასწაულს. დეტალურ ინფორმაციას ღონისძიების პროგრამის შესახებ მოგვიანებით მოგაწვდით“, – განაცხადა თბილისის მერმა.
ამასთან, კახა კალაძე თბილისობის ხარჯებთან დაკავშირებით კონკრეტული პოლიტიკოსების კრიტიკულ შეფასებებს გამოეხმაურა და აღნიშნა, რომ ეს აჟიოტაჟი მიზანმიმართულია. მისი თქმით, ჩვენი ქალაქი იმსახურებს, რომ თბილისობა ღირსეულად აღინიშნოს.
„რაც შეეხება თბილისობის ხარჯებთან დაკავშირებით რიგი პოლიტიკოსებისა და მათი სატელიტი მედიასაშუალებების მიერ გავრცელებულ განცხადებებსა და ინფორმაციებს, მათზე ყურადღების გამახვილებაც კი არ ღირს. რასაკვირველია, ასეთ მასშტაბურ ღონისძიებას სჭირდება თანხები და ასევე ყველასთვის გასაგებია, რომ როდესაც საუბარი გვაქვს კონცერტებზე და შემოქმედებით ღონისძიებებზე, მასზე წინასწარ ტენდერის გამოცხადება არის შეუძლებელი.
ეს აჟიოტაჟი „ნაციონალური მოძრაობის“ ტელევიზიების მხრიდან ყოველწლიური თანმდევი პროცესია ყველა ტიპის სადღესასწაულო ღონისძიების, რომელსაც მუნიციპალიტეტი აკეთებს.
იგივე სიტუაციაა ინფრასტრუქტურულ პროექტებთან დაკავშირებით, მიზანმიმართული სიცრუის პროპაგანდა მიმდინარეობს. მათ აუცილებლად უნდა მოატყუონ, ყოველ შემთხვევაში, ეცადონ, მოატყუონ საზოგადოება, რომ თბილისის მერიას მილების ჩადება დაავიწყდა, ან თითქოს ჭის თავების წამოწევა დაგვავიწყდა და ხელმეორედ დავიწყეთ ქუჩების გადათხრა და ასე შემდეგ.
საზოგადოებამ კარგად იცის მათი ხელწერა. ისინი ყოველდღიურად სიცრუის პროპაგანდით არიან დაკავებული. რაც შეეხება თბილისობას, მუნიციპალიტეტი ყველაფერს გააკეთებს უმაღლეს დონეზე. დარწმუნებული ვარ, ამ ქალაქში მცხოვრები ადამიანები ძალიან დიდ სიამოვნებას მიიღებენ აღნიშნული ღონისძიებებით. ჩვენი ქალაქი იმსახურებს, ღირსეულად აღნიშნოს თბილისობა და სწორედ ამას ვპირდებით თბილისელებს“, – განაცხადა კახა კალაძემ.
ინფორმაციას თბილისის მერიის პრესსამსახური ავრცელებს
