საქართველოს მე-3 პრეზიდენტის ჯანმრთელობის მდგომარეობის გამოკვლევის მიზნით უცხოელი ექსპერტები უკვე საქართველოში ჩამოვიდნენ და მიხეილ სააკაშვილი კლინიკა ,,ვივამედში“ მოინახულეს. დეტალებზე ისაუბრა წამების მსხვერპლთა რეაბილიტაციის ცენტრ ,,ემპათიას“ ხელმძღვანელმა მარიამ ჯიშკარიანმა:
,,რა თქმა უნდა, მნიშვნელოვანია, როცა საერთაშორისო ექსპერტები ერთვებიან და დავუშვათ ადგილობრივ ექსპერტებთან ერთად, ერთიანი, შეჯერებული პოზიცია იქნება წარმოდგენილი.
ჩვენ ვფიქრობთ, რომ ამას ძალიან დიდი მნიშვნელობა ექნება როგორც ადგილობრივი სასამართლოსათვის, ისე შემდგომშიც, თუ საჭირო გახდა ადამიანის უფლებათა ევროპულ სასამართლოში.
კითხვები არის ძალიან ბევრი. პირველ რიგში, მთავარი კითხვა გახლავს მისი ამჟამინდელი ჯანმრთელობის მდგომარეობა. ასევე, მისი მკურნალობა და ჯანმრთელობის მდგომარეობა პატიმრობის მომენტიდან მოყოლებული, – თუ როგორ მიმდინარეობდა? რა გარემოებები იყო? იყო თუ არა ადეკვატური მკურნალობა? იყო თუ არა ადამიანური მოპყრობის ფაქტები? და ა.შ.
შემდგომში შეფასებული იქნება მისი ჯანმრთელობის მდგომარეობა ციხეში მოხვედრამდე და გაცემული იქნება რეკომენდაციები, თუ როგორი უნდა იყოს მისი მკურნალობა და რეაბილიტაცია მომავალში და რატომ არის მნიშვნელოვანი, რომ მას მიეცეს შესაძლებლობა ჩაიტაროს ადეკვატური მკურნალობა და რეაბილიტაცია“, – განაცხადა მარიამ ჯიშკარიანმა.
ავტორი
ნინი ხიჯაკაძე
