საქართველოს პარლამენტის თავმჯდომარე შალვა პაპუაშვილი მწვავე შეფასებას აძლევს საქართველოში მოქმედი არასამთავრობო ორგანიზაციების საქმიანობას, ასევე საიას-ს მიერ ,,სამართლიანი არჩევნების“ სოლიდარობის ნიშნად სამუშაო ჯგუფის დატოვებას და მიაჩნია, რომ მათმა ქმედებებმა ქვეყანაში მიიღო კორპორატივიზმის ფორმა. პაპუაშვილის განცხადებით, ,,სამართლიანი არჩევნებისა და დემოკრატიის საერთაშორისო საზოგადოება“ (ISFED) მონაწილეობას ვერ მიიღებს საპარლამენტო სამუშაო ჯგუფების საქმიანობაში, სანამ სათანადო პოზიციას არ დააფიქსირებენ მათ მიერ წამოყენებულ ულტიმატუმთან დაკავშირებით:
,,გავზარდეთ ეს წარმომადგენლობა წინა პრაქტიკასთან შედარებით და ორი ორგანიზაცია არის, რომელიც ამავე დროს არის არა ფიქსირებულად სამუშაო ჯგუფის წევრი, არამედ როტაციის პრინციპია. პლატფორმიდან ნებისმიერ სხვა ორგანიზაციას შეუძლია მოვიდეს და მიიღოს მონაწილეობა.
რაც შეეხება იმ ორგანიზაციებს, რომლებიც იყვნენ ულტიმატუმის ავტორები, საქართველოს სახელმწიფოს უყენებდნენ, მათ შორის, იმ მუქარით, რომ თუ კი ეს ულტიმატუმი არ შესრულდებოდა ისინი სახალხო რისხვით, ყველას და ყველაფრის წალეკვით დაემუქრნენ სახელმწიფოს, რა თქმა უნდა, სანამ მათი პოზიცია არ იქნება ცხადი – ინარჩუნებენ, კვლავ მხარს უჭერენ თუ არა ამ ულტიმატუმს, სამუშაო ჯგუფების ფორმატში მათი მოწვევა არ არის განზრახული.
საქმე გვაქვს ჩვენ უბრალოდ იმპულსურ გადაწყვეტილებასთან. სამწუხაროდ, საქართველოში ჩამოყალიბდა არაჯანსაღი სოლიდარობა გარკვეულ ელიტურ არასამთავრობო ორგანიზაციებს შორის, რომელმაც უკვე მიიღო კორპორატივიზმის ფორმა, სადაც შინაარს აღარ უყურებენ ორგანიზაციები და უბრალოდ არ წირავენ ერთმანეთს. მიუხედავად იმისა რა დგას ამ ყველაფრის უკან სოლიდარობას გამოხატავენ ერთმანეთის მიმართ, რაც გადაზრდილია აბსოლუტურ კორპორატივიზმში.
მე კიდევ ერთელ გავიხსენებ 2020 წლის საპარლამენტო არჩევნების შემდეგ მდგომარეობას, მაშინაც ISFED-მა უკვე დამტკიცებულია, რომ საზოგადოებას 1 თვე უმალავდა პარალელური დათვლის ნამდვილ რიცხვებს. მიუხედავად ჩვენი მრავალჯერადი მოწოდებისა, მაშინაც სწორედ ამ ორგანიზაციებმა, კორპორატივიზმის მიზნებიდან და პრინციპებიდან გამომდინარე, ხელი დააფარეს უბრალოდ ISFED და ყველანაირად ცდილობდნენ, რომ არ ყოფილიყვნენ კრიტიკული მის მიმართ.
თუმცა, ზღვარი არის არასამთავრობო ორგანიზაციასა და პარტიას შორის. ეს ზღვარი არის სწორედ იქ, სადაც უკვე პარტიას აქვს მიზანი, რომ ჰქონდეს გადამწყვეტი სიტყვა მთავრობის ფორმირებაში და კანონების მიღებაში. ეს არის მთავარი განმასხვავებელი პარტიასა და არასამათავრობო ორგანიზაციას შორის“, – განაცხადა შალვა პაპუაშვილმა.
ავტორი
ნინი ხიჯაკაძე
