პენიტენციურ სისტემაში მომხდარ ფაქტთან დაკავშირებით სპეციალური საგამოძიებო სამსახურის მიერ გაკეთებულ განცხადებას უნდობლობას უცხადებს დაჭრილი მსჯავრდებულის, გურამ სვანიძის დედა, ნათია შენგელია:
“გამაგებინეთ, რანაირად მოხდა ჩემი შვილის ხელში იარაღი?! რანაირად მოხდა?
ის, რაც დაიდო ფეისბუქზე – სპეციალური საგამოძიებო სამსახურის განცხადება არის აბსოლუტური სიცრუე, საერთოდ არ უნდა ყოფილიყო იარაღიანი ადამიანი ჩემი შვილის ოთახში და მით უმეტეს, ცვლა იყო თუ არა, ექიმის გარეშე არაფერი არ უნდა ჩატარებულიყო… და ყველაფერი არის სიცრუე,” – აცხადებს ნათია შენგელია.
“ვიღაცამ იარაღი მისცა თავის მოსაკლავად“, – აცხადებს ოჯახის ახლობელი.
ფაქტთან დაკავშირებით კომენტარი გააკეთა მსჯავრდებულის ადვოკატმა, ზურაბ როსტიაშვილმა და განმარტებებს აკეთებს, თუ მისი აზრით რა მოხდა და რა მოიმოქმედა მსჯავრდებულმა:
“ბადრაგმა ფაქტიურად საშუალება მისცა [მსჯავრდებულს] იარაღი ამოეღო, ამის შემდგომ იღებს ამ იარაღს, ის თანამშრომელი გაიქცა, თუმცა მას შეეძლო დაეჭირა [მსჯავრდებული], როცა კაბურას ხსნიდა.
აქ სავარაუდოდ ფსიქიკურად დაავადებულთან გვაქვს საქმე, მაგრამ რატომ მიეცა საშუალება, ისე რატომ დაუდგა და რატომ მისცეს საშუალება იარაღი რომ აეღო?!” – აცხადებს ადვოკატი.
ინფორმაციისთვის: სპეციალურმა საგამოძიებო სამსახურმა განცხადება გაავრცელა, სადაც აღნიშნავს, რომ “2022 წლის 20 აგვისტოს დილის საათებში, ცვლის გადაბარების დროს, ბრალდებული პატიმარი გ.ს. უკნიდან მიეპარა სპეციალური პენიტენციური სამსახურის პენიტენციური დეპარტამენტის ესკორტირებისა და სპეციალური ღონისძიებების მთავარი სამმართველოს თანამშრომელს, რომელსაც ამოაცალა სამსახურებრივ-საშტატო ცეცხლსასროლი იარაღი და უმისამართოდ ერთი გასროლა განახორციელა, რის შემდეგაც ესკორტირების სამმართველოს თანამშრომლების მისამართით განახორციელა მეორე გასროლა (გასროლის შედეგად არავინ დაზარალებულა). ამის შემდეგ, იმავე იარაღიდან თავის არეში მიიყენა დაზიანება“.