პარლამენტის ფრაქცია “ერთიანი ნაციონალური მოძრაობა – ძალა ერთობაშიას” თავმჯდომარის, ხატია დეკანოიძის მიერ დაფიქსირებულ პოზიციას, მმართველი პარტიის დამოკიდებულებაზე მესამე სექტორთან, კერძოდ ორგანიზაცია “სამართლიან არჩევნებთან” მიმართებაში, ფრაქცია “ქართული ოცნების” თავმჯდომარის პირველი მოადგილე, გივი მიქანაძე კონკრეტული განმარტებებით ეხმაურება:
“ხატია დეკანოიძემ რაც განაცხადა, ეს არის მორიგი და ძალიან უხეში სახით სიცრუის ტირაჟირება იმასთან დაკავშირებით, რომ თითქოსდა “ქართული ოცნება”, თურმე, თავს ესხმის არასამთავრობო ორგანიზაციებს. არასამთავრობო ორგანიზაციებს “ქართული ოცნება” არასოდეს თავს არ ესხმოდა, “ნაციონალური მოძრაობისგან” განსხვავებით და გაიხსენონ თავის ხელისუფლების პერიოდში რას აკეთებდნენ ისინი, დამოუკიდებელ ორგანიზაციებთან და მედიასთან მიმართებაში.
როდესაც უკვე პოლიტიკური განცხადებები კეთდება და კონკრეტული ორგანიზაციის და მისი ხელმძღვანელის პოლიტიკურ პროცესებში ჩართულობა იკვეთება, ამ შემთხვევაში ეს ორგანიზაცია ვერანაირად ვერ იქნება აღქმული, როგორც ნეიტრალური. სწორედ ეს არის ერთადერთი მიზეზი იმისა, თუ რატომ არ მოხდა “სამართლიანი არჩევნების” მოწვევა.
თუ ორგანიზაცია დააფიქსირებს, რომ ემიჯნება და მისთვის ის განცხადებები და ის მოთხოვნები, რაც მთავრობის გადადგომასთან, ტექნიკური მთავრობის ჩამოყალიბებასთან, არასამთავრობოებისთვის ტექნიკურის ჩამოყალიბების დროს ვეტოს დადებასთან არის დაკავშირებული, თუ ეს მისთვის მიუღებელია და ემიჯნება ამ პროცესს, 25 აგვისტოს სამუშაო ჯგუფის მორიგ შეხვედრაზე, თუკი პლატფორმა კვლავ წარადგენს ამ ორგანიზაციას, ჩვენი კარი ღიაა მისთვის,” – აცხადებს გივი მიქანაძე.
