საქართველოს პარლამენტის წევრი, ,,სტრატეგია აღმაშენებლის“ გენერალური მდივანი პაატა მანჯგალაძე ჟურნალისტებთან კომენტარს აკეთებს ევროკავშირის ანგარიშის შესახებ საქართველოსთან მიმართებაში და მწვავე შეფასებებს აკეთებს ხელისუფლების, ბიძინა ივანიშვილის მიმართ:
,,რაც შეეხება ევროკავშირის ანგარიშს, იქ ნათლად გვითხრეს, რომ საქართველოში სუსტია დემოკრატია, სახელმწიფო ინსტიტუტები. კვლავ არის საუბარი იმაზე, რომ ფაქტიურად მიტაცებულია ძალაუფლება.
ჩვენ შეგვიძლია პირდაპირ შეფასება გავაკეთოთ, რომ ოლიგარქიული მმართველობა შეუთავსებელია ევროპასთან. ამიტომ თუ გვინდა, ჩვენ გავხდეთ ევროპის ნაწილი, უნდა მივიღოთ კანდიდატის სტატუსი, შემდეგ გავხდეთ წევრი.
აუცილებელია, ძალაუფლება დაიბრუნოს ხალხმა! დღეს ძალაუფლება მიტაცებული აქვს ერთ ადამიანს – ბიძინა ივანიშვილს! არც პარლამენტი, არც მთავრობა, არც მინისტრი – არაფერს არ ნიშნავს, სამწუხაროდ. ამაზე იყო საუბარი ერთიანობაში, ამ ანგარიშში.
ჩემთვის მთავარი სასამართლოსთან დაკავშირებული საკითხია – სუსტი სახელმწიფო უწყებები, სუსტი გავლენა პოლიტიკაზე ამ უწყებების. მე არ მჯერა იმ პროცესების, რასაც ,,ქართული ოცნება“ ახლა ამბობს, რომ კომიტეტებთან არსებულ სამუშაო ფორმატებში ბიძინა ივანიშვილი დათმობს ძალაუფლებას და მოახდენს დეოლიგარქიზაციას. ეს არის ილუზია და ეს მოლოდინი არ გამაჩნია.
,,ქართული ოცნება“ არ აღიარებს კლანის არსებობას სასამართლოში. მთავარი პრობლემა არის კლანი. მიტაცებულია იქაც ძალაუფლება. ეს ძალაუფლება კონცენტრირებულია იუსტიციის საბჭოში. ვიდრე იუსტიციის საბჭოს აკონტროლებს კლანი, ანუ ბიძინა ივანიშვილი, მანამდე სასამართლოს რეფორმაზე საუბარი არის აბსურდი“, – განაცხადა პაატა მანჯგალაძემ.
ავტორი
ნინი ხიჯაკაძე
