“განსაკუთრებულად სამწუხაროა, რომ კელი დეგნანის წინააღმდეგ კამპანიაში მონაწილეობა მიიღეს სასამართლო სისტემის მოქმედმა, თუ ყოფილმა წარმომადგენლებმაც” – ორგანიზაცია “საქართველოს სასამართლოს გუშაგი”

ორგანიზაცია „საქართველოს სასამართლოს გუშაგი“ სასამართლო სისტემის წარმომადგენლების მხრიდან ამერიკის შეერთებული შტატების ელჩზე საქართველოში, კელი დეგნანზე თავდასხმებზე საუბრობს, აღნიშნულის გამო წუხილს გამოთქვამს და სრულ მხარდაჭერას უცხადებს ამერიკელ დიპლომატს:

“ბოლო დროს გახშირდა სიტყვიერი თავდასხმა ქალბატონ კელი დეგნანზე – ჩვენი სტრატეგიული პარტნიორი ქვეყნის, ამერიკის შეერთებული შტატების ელჩზე საქართველოში.

„საქართველოს სასამართლოს გუშაგისთვის“ განსაკუთრებულად სამწუხაროა, რომ ამ კამპანიაში მონაწილეობა მიიღეს სასამართლო სისტემის მოქმედმა, თუ ყოფილმა წარმომადგენლებმაც.

ჩვენ გვახსოვს და ვაფასებთ დახმარებას, რასაც შეერთებული შტატები საქართველოს უწევს, მათ შორის, დემოკრატიის გაძლიერების მიზნით. განსაკუთრებით აღსანიშნავია ამერიკელი ხალხის დახმარება მართლმსაჯულების სფეროში.

„საქართველოს სასამართლოს გუშაგი“ მადლობას უხდის აშშ-ის საელჩოსა და პირადად ელჩ კელი დეგნანს საქართველოს მხარდაჭერისთვის.

იმედი გვაქვს, ცალკეული პირების უპასუხისმგებლო განცხადებები ვერ შეაფერხებს ჩვენი ქვეყნისთვის ესოდენ საჭირო და მნიშვნელოვან თანამშრომლობას ამერიკის შეერთებულ შტატებთან“, – ნათქვამია გავრცელებულ განცხადებაში.

ინფორმაციას ორგანიზაცია „საქართველოს სასამართლოს გუშაგი“ ავრცელებს