თბილისის ქუჩებში ახალი ბანერები გამოჩნდა წარწერით ,,რუსეთს უნდა ომი და არა დასავლეთს“. აღნიშნულ ფაქტზე კომენტარი გააკეთა საპარლამენტო უმრავლესობის წევრმა დავით მათიკაშვილმა, რომელიც ,,ნაციონალურ მოძრაობას“ მოუწოდებს, რომ გაემიჯნონ საქართველოს ომში ჩართვას:
,,ის, რომ რუსეთი ოკუპანტია ამას არანაირი პროპაგანდა არ სჭირდება. ეს მავთულხლართებითაც კარგად დასტურდება და საზოგადოებისთვის ყველაფერი ეს არის ძალიან კარგად ცნობილი.
ამ უაზრო და გაუგებარ “პროპაგანდას” ჯობია ,,ნაციონალურმა მოძრაობამ“ გააკეთოს ის, რაც დღემდე არ გაუკეთებია – გაემიჯნოს იმ ირიბ თუ პირდაპირ მოწოდებებს, რომელიც ჩვენი ქვეყნის ომში ჩართვას გულისხმობდა და გულისხმობს.
მიდის ლუსტრაციის საინტერესო პროცესი. კიდევ ვინ ჩაერთვება ესეც ძალიან მნიშვნელოვანია. ჩვენ არასდროს არ გვითქვამს, რომ დასავლეთი არის დაინტერესებული ომის მეორე ფრონტის არსებობით.
ჩვენ ყოველთვის ვამბობდით, რომ არიან ძალიან სერიოზული ძალები, რომელთაც სურთ, რომ კავკასიაში და საქართველოში იხილონ მეორე ფრონტი“, – განაცხადა დავით მათიკაშვილმა.
ავტორი
ნინი ხიჯაკაძე
