სოციალურ ქსელში გამოქვეყნებულ პოსტში შშმ პირთან მიმართებაში მეტი გულისხმიერების გამოჩენის აუცილებლობაზე საუბრობს “სტრატეგია აღმაშენებლის” სოციალური მიმართულების ხელმძღვანელი თეონა ჭალიძე:
“მივმართავ ყველას, ვინც ავტობუსით მგზავრობს. ავტობუსში ერთი ადგილი არის გამოყოფილი ეტლით მოსარგებლე შშმ პირისთვის. სულ რომ გაჭედილი იყოს ხალხით ავტობუსი, რაც პიკის საათებში ხშირია, თუ გაჩერებაზე ეტლით მოსარგებლე შშმ პირი გხვდებათ, კეთილი უნდა ინებოთ და ის ერთი, მისი კუთვნილი ადგილი, გაანთავისუფლოთ. თუნდაც ჩამოსვლა დაგჭირდეთ ავტობუსიდან ხუთ ან შვიდ ადამიანს. ,,რა ვქნა მაგვიანდება” და მსგავსი ტექსტებით კი არ უნდა შემოიფარგლოთ და გაჩერებაზე კი არ უნდა დატოვოთ ეტლით მოსარგებლე ადამიანი…
ცოტა ემპათია, ცოტა შეგნება და სხვის მდგომარეობაში შესვლაა საჭირო. ესეც რომ არა, ის ერთი ადგილი თქვენი არაა და რაც სხვისია იმას ნუ წაეპოტინებით.
პს: ცოტა უხეშად გამომდის შესაძლოა, მაგრამ არის რაღაცეები, რაც არ უნდა გვეშლებოდეს, როგორც საზოგადოების წევრებს და ცივილიზებულ ადამიანებს. დრო გარბის და ძალიან ნელა ვსწავლობთ. ცოტა ავჩქარდეთ სასიკეთო ცვლილებების ნაწილში“, – წერს ფეისბუქის პირად გვერდზე თეონა ჭალიძე.
