ველური ბუნების ეროვნული სააგენტო აგრძელებს საინტერესო მასალების გამოქვეყნებას საქართველოს ფაუნის შესახებ. გაიცანით უნიკალური წარმომადგენელი და კრწანისის ტყეპარკის მობინადრე ფრინველი კოლხური ხოხობი – Common pheasant (Phasianus colchicus).
როგორც ცნობილია, კოლხური ხოხობი პირველად ძველმა ბერძნებმა დასავლეთ საქართველოში, კერძოდ კოლხეთში, მდინარე ფაზისის (დღევანდელი რიონი) ჭალაში აღმოაჩინეს და სწორედ აქედან მოდის მისი ლათინური დასახელება – Phasianus colchicus.
კოლხური ხოხბის რაოდენობა დღესდღეობით საკმაოდ შემცირებულია და ნაკრძალების და სანადირო მეურნეობების გარდა იშვიათად გვხვდება. სწორედ ამიტომ, ველური ბუნების ეროვნული სააგენტო ადგილობრივი ველური სახეობის ფაუნის გამრავლების და ბუნებაში აღდგენის პროექტს 2016 წლიდან ახორციელებს. პროექტის ფარგლებში, ყოველწლიურად, კოლხური ხოხბის, კაკბისა და პორფირიონის (ხონთქრის ქათამი) პოპულაციის ზრდა და ბუნებაში გაშვება ხდება.
