საზოგადოებრივი მაუწყებლის სამეურვეო საბჭოს წევრი, ჟურნალისტი ბონდო მძინარაშვილი ევროკომისიის გადაწყვეტილებას ეხმაურება, ბრალდებების ისარი “ნაციონალური მოძრაობის” მისამართით გადააქვს, ამასტან მიმართავს მედიას და კონკრეტული საფრთხის თაობაზე საუბრობს:
“ევროკომისიის თქმა რად გინდოდათ, უკვე წლებია, პოლიტიკური პოლარიზაციის დამანგრეველ შედეგებზე ვლაპარაკობ და კონკრეტულ მიზეზებსაც ვასახელებ, – კონკრეტული ფაქტებით, მშვიდადაც, ჩხუბითაც!
უპირველესად, ეს არის ნაცსექტის ჯიუტი მცდელობა, კვლავ ხელში ჩაიგდოს ძალაუფლება!
იქნებ, ახლა მაინც გააცნობიეროს პოლიტიკურმა კლასმა, რომ სააკაშვილის “ნაციონალური მოძრაობა” არის საქართველოს მუხრუჭი და ამ ვითომ პარტნიორ პოლიტიკურ ძალებსაც ჭაობში ითრევს, – პოლარიზაციის და დესტაბილიზაციის ჭაობში!
საქართველოში პოლიტიკური ველის განაღმვა უნდა იყოს უპირველესი ამოცანა და ამ პროცესში უდიდესი პასუხისმგებლობა ეკისრება მედიას!
აუცილებელია ტემპერატურის დაწევა! სხვა გზა არ არსებობს მდგომარეობის გაჯანსაღებისთვის!
ამიტომ, რაკი ვაცნობიერებ ამ პროცესში პირადად ჩემი, როგორც ერთი მოქალაქის და ჟურნალისტის პასუხისმგებლობას და ევროკომისიის დათქმასაც ვასრულებ, საჯაროდ ვაცხადებ: ე. წ. ცხელ-ცხელ შოებში მონაწილეობას აღარ ვაპირებ!
ჟურნალისტებსაც მივმართავ: თქვენც დაუწიეთ ფითილს, რადგან სავსებით რეალურია საფრთხე, რომ ამდენმა ცეცხლმა ქვეყანა მიიწვას და ყველა ერთად ამოვიბუგოთ!
ვისაც ჩემი აზრი გაინტერესებთ, მიმიწვიეთ და მოგახსენებთ, რა არის საჭირო პოლარიზაციის დასაძლევად და ქვეყნის განვითარებისთვის!
მშვიდად მოგახსენებთ!” – წერს ფეისბუქის პირად გვერდზე ბონდო მძინარაშვილი.
