თბილისის საქალაქო სასამართლოში დღეს განაჩენი გამოცხადდა. მოსამართლე ლაშა ჩხიკვაძემ „მთავარი არხის“ გენერალურ დირექტორი, ნიკა გვარამია დამნაშავედ ცნო და მას პატიმრობა მიუსაჯა:
“სასამართლომ დაადგინა: ნიკა გვარამია ცნობილი იქნას დამნაშავედ საქართველოს სისხლის სამართლის კოდექსის 220-ე მუხლით ჩადენილი დანაშაულისთვის.
ე.წ. 2015 წლის ეპიზოდი – ძირითადი სასჯელის სახით და ზომად განესაზღვროს ჯარიმა 50 ათასი ლარის ოდენობით, სახელმწიფო ბიუჯეტის სასარგებლოდ.
ე.წ. ავტომანქანის ეპიზოდი – ძირითადი სასჯელის სახით და ზომად განესაზღვროს თავისუფლების აღკვეთა 3 წლისა და 6 თვის ვადით.
სსსკ 59-ე მუხლის თანახმად – უფრო მკაცრმა ძირითადმა სასჯელმა შთანთქოს ნაკლებად მძიმე ძირითადი სასჯელი და საბოლოოდ ნიკა გვარამიას, დანაშაულებათა ერთობლიობით, ძირითადი სასჯელის სახით და ზომად განესაზღვროს თავისუფლების აღკვეთა 3 წლისა და 6 თვის ვადით
სასჯელის მოხდის ვადის ათვლა ნიკა გვარამიას დაეწყოს 2022 წლის 16 მაისის 10:20 საათიდან და ნიკა გვარამია დაუყოვნებლივ დაკავებულ იქნას სასამართლოს სხდომის დარბაზში“, – განაცხადა მოსამართლე ლაშა ჩხიკვაძემ.
“ყოჩაღ!” – ამ რეპლიკით უპასუხა ნიკა გვარამია მოსამართლეს.
სასამართლოს გადაწყვეტილებით, ნიკა გვარამიას სახელზე შეტანილი გირაო ერთი თვის ვადაში უკან დაბრუნდება.
გადაწყვეტილების გამოცხადებამდე ნიკა გვარამიამ განცხადება გააკეთა ჟურნალისტებთან:
“მე ვარ უდანაშაულო კაცი, დამნაშავე რეჟიმი რას იზამს, არ ვიცი!” – განაცხადა ნიკა გვარამიამ.