“ძალიან უცნაური ამბავი გავრცელდა – კინოაკადემიამ მოხსნა სალომე ჯაშის ფილმი „მოთვინიერება“ თავისი კინოდარბაზის ეკრანიდან” – ნანა ჯანელიძე

კინორეჟისორი ნანა ჯანელიძე სოციალურ ქსელში პოსტს აქვეყნებს და კონკრეტულ შეკითხვას სვამს, მრავალწლოვანი ხეების სხვადასხვა ადგილებიდან დენდროლოგიურ პარკში გადატანაზე, სალომე ჯაშის მიერ გადაღებული დოკუმენტური ფილმის „მოთვინიერების“ კინოაკადემიის კინოდარბაზების ეკრანებზე ჩვენების გაგრძელებაზე უართან დაკავშირებით:

“ძალიან უცნაური ამბავი გავრცელდა – კინოაკადემიამ მოხსნა სალომე ჯაშის ფილმი „მოთვინიერება“ თავისი კინოდარბაზის ეკრანიდან.

ის რაც წარმოადგენდა ჩვენი ცხოვრების განუყოფელ ნაწილს, შემოქმედების თავისუფლება, ამ გადაწყვეტილებით ერთბაშად ეჭვქვეშ დადგა. მითუმეტეს, რომ კინოაკადემია არის თავისუფალ კინემატოგრაფისტთა კავშირი და ის პირიქით, უნდა იცავდეს შემოქმედების თავისუფლებას და ამის სადარაჯოზე უნდა იდგეს.

იქიდან გამომდინარე, რომ ყველა ყოფილი კინოკავშირის წევრი მექანიკურად გადაიქცა კინოაკადემიკოსად და ალბათ მეც, მათ შორის, ვემიჯნები ამ გადაწყვეტილებას და კითხვას ვსვამ – ეს კინოაკადემიის სამდივნოს ერთობლივი გადაწყვეტილებაა? თუ ეს ასეა, უარს ვაცხადებ კინოაკადემიის წევრობაზე“, – წერს ფეისბუქის პირად გვერდზე ნანა ჯანელიძე.