უკრაინის რადას სპიკერი, რუსლან სტეფანჩუკი სოციალურ ქსელში გამოქვეყნებული პოსტით საქართველოს პარლამენტის თავმჯდომარეს მიმართავს და თავის გულისტკივილს აფიქსირებს:
“არაშესაფერისი. ზუსტად ას აღწერა საქართველოს პარლამენტის თავმჯდომარე შალვა პაპუაშვილმა ბუჩასა და ირპენის მოსანახულებლად ჩემი მოწვევა.
ის ფიქრობს, რომ სანამ უკრაინის ხელისუფლების ცალკეული წარმომადგენლები სრულად არ გაიაზრებენ იმ მძლავრ მხარდაჭერას, რასაც მათ საქართველო უწევს, მანამდე შეუძლებელია უკრაინაში გამგზავრება.
ძლიერ მხარდაჭერაში მას მიაჩნია გაეროში უკრაინის სასარგებლოდ კენჭისყრაში მხარდაჭერა.
კოლეგა, უკრაინა აფასებს ნებისმიერ მხარდაჭერას სხვადასხვა ქვეყნიდან, ამ მძიმე ჟამს. ჩვენ ყოველდღე ვითხოვთ რუსეთზე სანქციების გაძლიერებას, ვითხოვთ სამხედრო, პოლიტიკურ თუ ფინანსურ მხარდაჭერას. არის ქვეყნები, რომლებიც ყველა მიმართულებით გვეხმარებიან, ზოგი კი – მხოლოდ ერთეულ საკითხებში.
ჩვენ ვაფასებთ და ყოველთვის ვაფასებდით მოძმე ქართველი ხალხის გულწრფელ მხარდაჭერას. ჩვენ ვიცით, რომ ქართველები გულწრფელი და მამაცი მეომრები არიან, რომელთაგან ბევრი დღეს მხარში უდგას ჩვენს დამცველებს და იცავს უკრაინას რუსეთის შემოჭრისგან. ისევე როგორც, ბევრი უკრაინელი 2008 წელს იდგნენ ქართველების გვერდით, იმ რუსეთის წინააღმდეგ, რომელმაც ხელჰყო თქვენი დამოუკიდებლობა, დახოცა თქვენი ხალხი და დაეპატრონა თქვენი ტერიტორიის ნაწილის.
ჩვენ არ ვზომავთ მხარდაჭერას, მხარდაჭერა გულწრფელი უნდა იყოს ყოველთვის. ყველა, ვინც ასეთ მხარდაჭერას გამოხატავს, იქცევა გარემოების, სინდისისა და მოვალეობის გრძნობის შესაბამისად. ხოლო შესაბამის შეფასებას, ჩვენ, პოლიტიკოსებს, ჩვენივე ხალხი და ისტორია მოგვცემს.
ერთადერთი რაც მაწუხებს – ეს არის კითხვა: მისაღებია კი უწოდო “მიზანშეუწონელი” მეგობარ ქვეყანაში ჩამოსვლის მოწვევას და ნახო მისი უბედურება, გაიზიარო მწუხარება, გამოხატო თანაგრძნობა?!
ვფიქრობ, რომ მეგობარმა ეს დაუპატიჟებლადაც უნდა გააკეთოს.
არადა, სწორედ ამაზე საუბრობდა დიდი შოთა რუსთაველი: “ხამს მოყვარე მოყვრისათვის თავი ჭირსა არ დამრიდად, გული მისცეს გულისათვის, სიყვარული – გზად და ხიდად“, – წერს ფეისბუქის საკუთარ გვერდზე რუსლან სტეფანჩუკი.
