პარტია ,,დროას“ თავმჯდომარე ელენე ხოშტარია საგანგებოდ გამართულ ბრიფინგზე კომენტარს აკეთებს 9 აპრილის დღესთან დაკავშირებით. ოპოზიციონერი ლიდერი, რეგიონში მიმდინარე პროცესებთან დაკავშირებითაც აკეთებს შეფასებებს:
,,სულ რამდენიმე დღეში დგება დღე – 9 აპრილი, რომელმაც განსაზღვრა, შექმნა ჩვენი სახელმწიფო. დღე, რომელმაც გვასწავლა ყველაზე მთავარი თავისუფლება და ერთიანობა არის ის საფუძველი, რაზეც დგას საქართველოს ყველა მოქალაქე, 30 წლის განმავლობაში. ეს არის დღე, როდესაც ბოროტების იმპერია დამარცხდა მართალი, მებრძოლი, პრინციპული, დამოუკიდებლობის იდეით შეპყრობილი, ერთიანობით გაძლიერებული საქართველს მოქალაქეების მიერ. ეს არის დღე, რომელმაც მოიტანა მსხვერპლი და ეს არის დღე, რომელმაც მოიტანა დამოუკიდებლობა და თავისუფლება.
არასდროს ყოფილა ისეთი მნიშვნელოვანი იდეები – თავისუფლების, დამოუკიდებლობის, ერთიანობის, როგორიც არის დღეს.
ბოროტების იმპერიამ გადაწყვიტა, რომ წაგვართვას ის, რაც ჩვენ მოვიპოვეთ და შევქმენით. 9 აპრილის შემდეგ ჩვენ არაერთი უმძიმესი პერიოდი გამოვიარეთ, როდესაც კრემლი საკუთარი აქ შემქნილი აგენტებით თუ რაღაც ჯგუფების მეშვეობით ებრძოდა ჩვენს ერთიაობას, ჩვენს თავისუფლებას და მშვიდობას.
მიუხედავად ამისა, ჩვენ გვიჩიჩინებენ, რომ ვართ განსხვავებულები, გვაქვს ბევრი საჩხუბარი, რომ ვართ ცუდები, სუსტები. სინამდვილეში – ჩვენი ისტორია არის სავსე ღირსებით და თავისუფლების მოფრთხილებით.
ჩვენ გვყავს ის დევნილები, რომლებსაც დღეს ვუყურებთ ბუჩადან, მარიუპოლიდან და ბევრი სხვა ქალაქიდან, რომლებიც ეწირებიან რუსულ იმპერიას. ჩვენ გვყავს ის თაობა, რომელიც უკვე დაიბადა თავისუფალ საქართველოში და ისინი არავის არ აპირებენ, რომ დაუთმონ საკუთარი თავისუფლება, კეთილდღეობა და მშვიდობა.
ჩვენ, საქართველოს ყველა მოქალაქეს გვაქვს ისტორიული ამოცანა – ერთი წუთით გადავდოთ ის ხელოვნური გამყოფი ხაზები, რომლებიც ჩვენ დაგვიწესა კრემლმა და “ქართულმა ოცნებამ”, 9 აპრილის იდეის გარშემო ჩვენ ვართ ყველა ერთნი და ერთიანობაშია ჩვენი ძალა“, – განაცხადა ელენე ხოშტარიამ.
ავტორი
ნინი ხიჯაკაძე
