პრემიერ-მინისტრი ირაკლი ღარიბაშვილი კომენტარს აკეთებს რუსეთ-უკრაინის ომთან დაკავშირებით. მმართველი პარტიის ლიდერის აზრით, უკრაინაში მიმდინარე ომის შემჩერებელი ჯერ-ჯერობით არავინაა:
,,კიდევ ერთხელ მინდა ვთქვა, რომ რაც ხდება დღეს უკრაინაში, რა თქმა უნდა, არის ჩვენთვის, ყველასთვის უაღრესად შემაშფოთებელი.
4000-ზე მეტი საცხოვრებელი კორპუსი არის დანგრეული, განადგურებული. ქალაქები არის მიწასთან გასწორებული. ათასობით სამოქალაქო პირი შეეწირა ამ ომს, ამ უდებურებას და დღემდე გრძელდება ეს ტრაგიკული მოვლენები.
სწორედ ამაზე ვსაუბრობდი მე ჯერ კიდევ 25 თებერვალს, რომ თუ ვინმე დაიჩაგრებოდა და დაისჯებოდა ამ ომით იქნებოდა უკრაინა, შეეწირებოდა ათასობით უკრაინელის სიცოცხლე, მათი ტერიტორიული მთლიანობა დაირღვეოდა. ასეც არის!
თქვენ ხედავთ, რომ მთელი რიგი ტერიტორიები არის ოკუპირებული დღეს რუსეთის მიერ უკრაინაში და ეს პროცესი თქვენ ხედავთ რომ გრძელდება. ამის შემჩერებელი, სამწუხაროდ და საუბედუროდ, ვხედავთ, რომ ჯერ-ჯერობით არავინ არის.
ასე, რომ კიდევ ერთხელ მე მინდა გამოვხატო ჩემი სოლიდარობა ჩვენი მთავრობის სახელით უკრაინის, უკრაინელების მიმართ.
ჩვენ 400 ტონა ჰუმანიტარული ტვირთი გავაგზავნეთ უკრაინაში და მაქსიმუმს ვაკეთებთ იმისთვის, რომ უკრაინის მოქალაქეები, რომლებიც ჩამოდიან საქართველოში მაქსიმალური ყურადღება და ზრუნვა გამოვიჩინოთ. იქნება ეს განათლების მიმართულებით, ჯანდაცვის, სხვა ნებისმიერი მათი საჭიროების გადაწყვეტის მიხედვით. ჩვენ ასეც გავაგრძელებთ და რა თქმა უნდა ჩვენი დიდი სურვილი, ჩვენი ოცნება არის, რომ ეს ომი რაც შეიძლება მალე დასრულდეს.
ამიტომ, კიდევ ერთხელ იმ ქვეყნებს და იმ ლიდერებს, ვისაც ხელეწიფებათ ამ ომის შეჩერება, ყველაფერი უნდა გააკეთონ, რადგან რაც შეიძლება მალე დაასრულონ ეს ომი”, – განაცხადა ირაკლი ღარიბაშვილმა.
ავტორი
ნინი ხიჯაკაძე
