“შიდა ქართლის რუსეთთან სამუდამოდ შეერთების საფრთხე ისეთი დიდი არასოდეს ყოფილა, როგორიც ამ წუთებშია” – შალვა ნათელაშვილი

,,ლეიბორისტული პარტიის“ თავმჯდომარე შალვა ნათელაშვილი პარტიის ოფისში გამართულ საგანგებო ბრიფინგზე მწვავე განცხადებას აკეთებს ოკუპირებულ ტერიტორიებზე განვითარებულ მოვლენებთან დაკავშირებით. ოპოზიციონერი ლიდერი იმ ძირითად გზების შესახებ საუბრობს, თუ როგორ შეიძლება ოკუპირებული ტერიტორიებთან მიმართებაში ანექსიის აცილება:

,,შიდა ქართლის რუსეთთან სამუდამოდ შეერთების საფრთხე ისეთი დიდი არასოდეს არ ყოფილა, როგორიც ამ წუთებშია. ჩვენ, ალბათ, უკვე დავრწმუნდით, რომ განცხადებები ივანიშვილის ფარულ მოლაპარაკებებზე კრემლთან ოკუპირებული ტერიტორიების სამუდამოდ მიყიდვაზე, რეალურია. მთავრობის დუმილი და დიპლომატიური პასუხებიც ამის კიდევ ერთი დასტურია.

იმისათვის, რომ ჩვენ სამუდამოდ არ დავკარგოთ ადგილი, სადაც შეიქმნა ქართველი ერის ეთნიკური, კულტურული, ფილოსოფიური, ლიტერატურული ცნობიერება და საიდანაც აღმოცენდა ჩვენი სამშობლო, აუცილებელია სასწრაფოდ გატარდეს შემდეგი ღონისძიებები:

1. პრეზიდენტი და პრემიერი ჩავიდნენ ნიუ-იორკში და მოიწვიო გაეროს უშიშროების საბჭოს საგანგებო სხდომა;

2. გაიმართოს პარლამენტის საგანგებო სესია და მიღებულ იქნას რეზოლუცია ქართველი ერის მიმდინარე გენოციდზე რუსეთის ფედერაციის მხრიდან;

3. მთავრობამ სასწრაფოდ მიმართოს შესაბამის ინსტანციებს და შეიქმნას ჰააგის სპეციალური ტრიბუნალი რუსეთის პოლიტიკური ხელმძღვანელობის წინააღმდეგ, ქართველი ერის გენოციდის გამო ცხინვალის რეგიონსა და აფხაზეთის ტერიტორიაზე.

ცხინვალის რეგიონში მოქმედ ყველა თვითმარქვია სეპარტისტზე, ეს იქნება ე.წ. პარლამენტის/მთავრობის წევრი, ძალოვანი სტრუქტურის ხელმძღვანელი, რეგიონის უფროსები და რუსეთის სარდლობის წარმომადგენლები – დაწესდეს ისეთი ფინანსური და დიპლომატიური სანქციები, რომ მათ ფეხი ვერ გაადგან მსოფლიოს ვერცერთ ქვეყანაში.

დაიწყოს დაუყოვნებლივ მოლაპარაკებები ვაშინგტონთან, რათა აშშ-სა და საქართველოს შორის გაფორმდეს ურთიერთთავდაცვის ხელშეკრულება, ხოლო საქართველოში დაუყოვნებლივ დაიწყოს ამერიკის სამხედრო ბაზების განლაგება“, – განაცხადა შალვა ნათელაშვილმა.

ავტორი
ნინი ხიჯაკაძე