31 წელი გავიდა 1991 წლის 31 მარტს საქართველოში გამართული საყოველთაო სახალხო რეფერენდუმიდან, რომელშიც სახელმწიფოებრივი დამოუკიდებლობის აღდგენას მხარი რეფერენდუმში მონაწილე საქართველოს მოქალაქეების 98.9%-მა დაუჭირა (მონაწილეობა კი მიიღო საარჩევნი ხმის უფლების მქონე მოსახლეობის 90.3%-მა).
„სტრატეგია აღმაშენებელმა“ პარლამენტში 1991 წლის 31 მარტის რეფერენდუმისადმი მიძღვნილი ღონისძიება გამართა, სადაც სახელმწიფოებრივი დამოუკიდებლობის აღდგენის აქტზე ხელისმომწერ უზენაესი საბჭოს წევრებს უმასპინძლა. ვაშაძე მიიჩნევს, რომ ეს დღე მნიშვნელოვანია ჩვენი ქვეყნისთვის და აღნიშნავს, რომ ამაზე დგას საქართველოს დამოუკიდებლობის და თავისუფლების ფუნდამენტი:
„გილოცავთ დღევანდელ დღეს 31 მარტს, 31 წლის წინ რეფერენდუმში მონაწილე მოსახლეობის 98.9%-მა მხარი დაუჭირა საქართველოს დამოუკიდებლობის აღდგენას. ვფიქრობ, რომ ძალიან მნიშვნელოვანია ეს დღე ყველამ ავღნიშნოთ, რადგან ამაზე დგას საქართველოს დამოუკიდებლობის და თავისუფლების ფუნდამენტი.
ჩვენ დღეს ვმასპინძლობთ იმ ადამიანებს, რომლებმაც ხელი მოაწერეს დამოუკიდებლობის აღდგენის აქტს, ეს არის ის სიმბოლური დაფასება, რომელიც შეიძლება გავაკეთოთ ამ ადამიანებთან მიმართებაში.
გამოვდივართ წინადადებით, რომ დაფასებული იყოს მათი ღვაწლი კონკრეტული ინიციატივებით პარლამენტში.
როდესაც ვსაუბრობთ ეროვნულ თანხმობაზე, სწორედ მსგავს დღეს, მსგავს საკითხებში ერთიანობას და თანხმობას აქვს გადამწყვეტი მნიშვნელობა, რომ ავაშენოთ ძლიერი სახელმწიფო“, – აცხადებს გიორგი ვაშაძე.
პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური
