კვირა, აპრილი 21, 2024

“ჩანს, რომ ეს არის ერთგვარად ანტიდასავლური განცხადება“ – მიხეილ სარჯველაძე დანილოვის განცხადებაზე

პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე მიხეილ სარჯველაძე პოლიტიკურ შეფასებას აკეთებს უკრაინის ეროვნული უსაფრთხოებისა და თავდაცვის საბჭოს მდივნის, ალექსეი დანილოვის განცხადებაზე. მმართველი გუნდის ერთ-ერთი ლიდერის განმარტებით, არავითარი გამართლება და მიზეზი არ შეიძლება ჰქონდეს საქართველოსთვის ახლა ომის დაწყების მოწოდებას:

,,ჩანს, რომ ეს არის ერთგვარად ანტიდასავლური განცხადება. იმ თვალსაზრისით, რომ მე არ მგონია, ამ შემთვევაში რამენაირად მშვიდობის აღსადგენად სასარგებლო აღმოჩნდეს ასეთი ტიპის განცხადებები, მოწოდებები და შესაბამისად, მით უმეტეს, მოვლენების იმ ხაზის მიხედვით განვითარება, რასაც უშიშროების საბჭოს მაღალჩინოსანი აკეთებს.

მეორე, ალბათ, რაც მნიშვნელოვანი და საყურადღებოა ეს არის, რომ ერთგვარად გაშიშვლდა რეალური მოტივაცია, შესაძლოა გარკვეული უკმაყოფილებებისა, რომელიც ისმოდა და უკავშირდებოდა მათ შორის საქართველოს.

ამ შემთხვევაში ვგულისხმობ იმას, რომ უკმაყოფილების რეალური მიზეზი არა სანქციები და განცხადებები იყო, არამედ როგორც ჩანს მოტივაცია სწორედ ამას უკავშირდებოდა, რომ იქნებ რამენაირად საქართველო ჩაერთოს სამხედრო ავანტიურაში და შესაბამისად, ამ გზით თითქოს და რაიმე დახმარება აღმოუჩინოს უკრაინას.

არავითარი გამართლება და მიზეზი არ შეიძლება ჰქონდეს საქართველოსთვის ახლა ომის დაწყების მოწოდებას. ყველაფერი შეიძლება დავარქვათ ამას გარდა ერთისა – ეს ნამდვილად არ არის საქართველოს ინტერესში“, – განაცხადა მიხეილ სარჯველაძემ.

ინფორმაციისთვის: უკრაინის ეროვნული უშიშროებისა და თავდაცვის საბჭოს მდივანი ალექსეი დანილოვი თავის განცხადებაში საქართველოსთან მიმართებაში საუბრობს და აღნიშნავს, რომ თუ საქართველო და სხვა ქვეყნები, დაკავებულები იქნებიან თავიანთი ტერიტორიების დაბრუნებით, ეს აუცილებლად დაგვეხმარება. დანილოვმა ასევე განაცხადა, რომ “საქართველო, მსუბუქად რომ ვთქვათ, არც ისე კორექტულად იქცევა“.

ავტორი
ნინი ხიჯაკაძე

კომენტარები - დატოვეთ თქვენი მოსაზრება

კვირის სხვა თემები

All

პოპულარული დღეს

ბოლო გამოქვეყნებული