გენერალური პროკურორი ირაკლი შოთაძე განცხადებას და განმარტებებს აკეთებს სტრასბურგის სასამართლოს გადაწყვეტილებაზე საქართველოს მე-3 პრეზიდენტის, მიხეილ სააკაშვილის სარჩელის დასაშვებად ცნობის შესახებ:
,,ეს გამარჯვება არის თუ დამარცხება, ამაზე საუბარი ნაადრევია, შემიძლია გითხრათ. დაცვა თუ ამას გამარჯვებად მიიჩნევს ძალიან საოცარია. ალბათ ისინი გამარჯვებად მიიჩნევენ იმ ფაქტს, რომ სტრასბურგს 6 თვის ნაცვლად თვენახევრის დაგვიანებით მიმართეს და პანდემიის გათვალისწინებით სტრასბურგის სასამართლომ ეს საპატიოდ ჩათვალა და დასაშვებად ცნო სარჩელი. ალბათ მათთვის ეს არის გამარჯვება, რომ ეს შეცდომა ეპატიათ. მეტი მათი გამარჯვების არანაირი ნიშან-წყალი ჯერ-ჯერობით არ არსებობს.
რას შეეხება ე.წ. პოლიტიკურ მართლმსაჯულებას, მე საზოგადოებას შევახსენებ იმ საქმეებს, რომლებზეც დღესდღეობით მიხეილ სააკაშვილი არის მსჯავრდებული თუ ბრალდებული. საუბარი არის სანდრო გირგვლიანის საქმეზე, ვალერი გელაშვილზე თავდასხმაზე, 7 ნოემბრის მშვიდობიანი მომიტინგეების დარბევაზე, კერძო ტელევიზია ,,იმედში“ შეჭრასა და დარბევაზე, ბადრი პატარკაციშვილის ოჯახისათვის ქონების წართმევაზე, ასევე – მილიონობით ლარის არამიზნობრივად ხარჯვაზე. შესაბამისად, აქ რა პოლიტიკურ მართმლსაჯულებაზე ვსაუბრობთ არის სრულიად გაუგებარი!“, – განაცხადა ირაკლი შოთაძემ.
გენერალური პროკურორის განცხადებაზე საპასუხო კომენტარს აკეთებს მიხეილ სააკაშვილის ადვოკატი შოთა თუთბერიძე:
,,მთავარ პროკურორს იმისთვის, რომ ეს გადაწყვეტილება სტრასბურგისა შეაფასოს დასჭირდება წაიკითხოს ის პირველ რიგში. იმიტომ, რომ იქ წერია, თუ რას ამტკიცებდა საქართველოს მთავრობა.
საქართველოს მთავრობას არ უნდოდა ეს საჩივარი ყოფილიყო დასაშვებად მიღებული, ყველაფერს აკეთებდა ამისთვის – უთითებდა ვადაზეც, საჩივრის დაუსაბუთებლობაზე და ა.შ.
სტრასბურგის სასამართლომ არ გაითვალისწინა მთავრობის არგუმენტაცია, არ ჩათვალა ისინი დამაჯერებლად და ეს პირდაპირ დაწერა განჩინებაში. გაითვალისწინა აპლიკანტის ანუ მიხეილ სააკაშვილის არგუმენტაცია“, – განაცხადა შოთა თუთბერიძემ.
ავტორი
ნინი ხიჯაკაძე
