“რადას სპიკერი მადლობას გიხდის და ბოკერია და უგულავა რომ შენით უკმაყოფილონი არიან, ესე იგი ძალიან სწორად ცხოვრობ” – გრიგოლ ვაშაძე

ოპოზიციონერი ლიდერის, პარლამენტის დეპუტატის გრიგოლ ვაშაძის მხრიდან ხელისუფლების კონკრეტული ნაბიჯების პოზიტიურად შეფასება განსჯის საგანი გახდა და ოპოზიციის ცალკეული წარმომადგენლების კრიტიკაც დაიმსახურა, რასაც გრიგოლ ვაშაძის მიერ ჟურნალისტებთან საკუთარი პოზიციის განმარტება მოჰყვა, შესაბამისი მაგალითების დასახელებით:

,,ის წიკვინი, რომელიც ატყდა იცით რა? – მარტივად გეტყვით – რადას სპიკერი მადლობას გიხდის და ბოკერია და უგულავა რომ შენით უკმაყოფილონი არიან, ესე იგი ძალიან სწორად ცხოვრობ.

რაც შეეხება მე, ჩემთვის სულ ერთი არის აბსოლუტურად, როდესაც სწორი ნაბიჯი არის გადადგმული, ვისზე უნდა ვთქვათ ჩვენ, რომ სწორი არის.
ჩამოგითვალოთ კიდევ ერთხელ:

• უკრაინის მხარდამჭერი რეზოლუცია გაეროში;
• მიცემული ხმა რუსეთის გარიცხვისთვის ევროპის საბჭოდან;
• კოსპონსორობა დიდ ბრიტანეთთან ერთად იმ სარჩელისა, რომელიც რუსეთის წინააღმდეგ 32-მა სახელმწიფომ ცივილიზებულმა, დემოკრატიულმა შეიტანა საერთაშორისო სასამართლოში.

კიდევ არის სამი რამ, რომელიც ვიცი, მაგრამ ვერ გეტყვით. იმიტომ, რომ არ არის ამის დრო.
ვინც ვერ გაიგო იმათ მე ეხლა ვერ ვუშველი. სილამაზის კონკურსში არ ვმონაწილეობ, რომ ყველას მოვწონდე. ის რაც მომეწონა ამაზე ვერავინ შემედავება“, – განაცხადა გრიგოლ ვაშაძემ.

ავტორი
ნინი ხიჯაკაძე