,,მთავარი არხის“ გადაცემაში ,,დღის სტუმარი“ ოპოზიციის ინიციატივის შესახებ – ვოლოდიმირ ზელენსკის საქართველოს პარლამენტში მოწვევასთან მიმართებაში, პოლიტიკურ შეფასებას აკეთებს ,,სტრატეგია აღმაშენებლის“ გენერალური მდივანი პაატა მანჯგალაძე:
,,დღეს ზელენსკი ცივილიზებული მსოფლიოს მიერ განხილულია როგორც თავისუფლების, უსამართლობასთან ბრძოლის სიმბოლო. პირდაპირ უნდა ვთქვათ, ასეთი აშკარა, ბოროტებასა და სიკეთეს შორის წყალგამყოფი, როგორც ახლა – მე არ მახსენდება თუ იყო ოდესმე. რუსეთი არის ბოროტება, ხოლო დანარჩენი მსოფლიო იბრძვის სიმართლისთვის, მშვიდობისთვის, თავისუფლებისთვის.
ამ დროს, როცა კითხვის ნიშნის ქვეშ დგება და ხელისუფლება ორჭოფობს – მე არც მეგონა, თუ კითხვის ქვეშ დადგებოდა საკითხი იმასთან დაკავშირებით, რომ ზელენსკიმ სიტყვით მიმართოს საქართველოს პარლამენტს. მას ხვდებიან აშშ კონგრესში, ინგლისის ლორდთა პალატაში, გერმანიის ბუნდესტაგში, ევროპარლამენტში – ტაშს უკრავენ, როგორც თავისუფლების სიმბოლოს, ამ დროს კი საქართველოს პარლამენტი რას ამბობს…
პაპუაშვილის გამოსვლის შემდეგ მე მიჩნდება ეჭვი და ვთქვი კიდეც, რომ მათთვის მისაღები ზელენსკის გზა კი არ არის – თავისუფლებისა და ბრძოლის, არამედ იანუკოვიჩის გზა – რომელმაც ხელსაყრელი პირობები შექმნა კოლაბორაციით, დაშალა 150 ათასიანი უკრაინული არმია და ომის საფრთხე სწორედ მან გააჩინა, მან შექმნა ოკუპაციის წინაპირობები.
მე ვარ გულშემატკივარი – მომწონს/არმომწონს სხვა საკითხია. ადამიანურად ვამბობ, გულისფანქცალით ვუყურებ ღარიბაშვილის, კობახიძის გამოსვლას – რამე ისეთი არ თქვან, რომ ქვეყანა დააზიანონ! ვგულშემატკივრობ ამ ბრძოლაში მათ, მაგრამ სამწუხაროდ, ეჭვი მაქვს და ისე არ აღმოჩნდეს, რომ ევროკავშირის წევრობის ნაცვლად, ევრაზიის კავშირის წევრები არ გავხდეთ, ვიყოთ ყველა ფხიზლად – მივმართავ მოსახლეობას“, – განაცხადა პაატა მანჯგალაძემ.
ავტორი
ნინი ხიჯაკაძე
