,,სტრატეგია აღმაშენებლის“ გენერალური მდივანი და პარლამენტის წევრი პაატა მანჯგალაძე მწვავე შეფასებას აკეთებს “ქართული ოცნების” თავმჯდომარის, ირაკლი კობახიძის მხრიდან სალომე ზურაბიშვილის საზღვარგარეთ განხორციელებულ ვიზიტსა და შეხვედრებთან არაკონსტიტუციური ქმედების რანგში გაყვანასთან დაკავშირებით:
,,კონსტიტუცია პრეზიდენტს არ დაურღვევია – პირდაპირ შემიძლია ვთქვა და ამ ქვეყნის მთავარი კანონმდებელი არის ხალხი.
დღეს პრეზიდენტი საუბრობდა ვის მოსწონს/ვის არ მოსწონს?! – უნდა ვაღიაროთ, რომ ის საუბრობდა იმ ეროვნულ ინტერესზე, რაც სჭირდება დღეს საქართველოს!
თუ ამის გამო ირაკლი კობახიძე გაბედავს და დაიწყებს იმპიჩმენტის პროცედურას – საკადრის პასუხს მიიღებს ქართველი ხალხისგან!
მე ამ შემთხვევაში ვიცავ არა პერსონალურად ზურაბიშვილს, არამედ ინსტიტუციას, რასაც ჰქვია პრეზიდენტის ინსტიტუტი“, – განაცხადა პაატა მანჯგალაძემ.
ინფორმაციისთვის – პრეზიდენტ სალომე ზურაბიშვილის განმარტებას, ევროპაში განხორციელებულ კერძო ვიზიტთან დაკავშირებით, კონკრეტული შეფასება მისცა ირაკლი კობახიძემ:
“2022 წლის 26 თებერვალს წერილობით მეთქვა უარი პარიზში, ბრიუსელში, ბერლინსა და ვარშავაში სამუშაო ვიზიტების გამართვაზე. არსებული ვითარების გათვალისწინებით გავაუქმე ყველა ოფიციალური ფორმატი. ასეთ დროს საჭიროდ მივიჩნიე ჩემი პირადი კონტაქტების გამოყენება და სამუშაო ვიზიტების პირად შეხვედრებად გადაქცევა“, – განაცხადა სალომე ზურაბიშვილმა საქართველოს პარლამენტში სიტყვით გამოსვლისას.
ამასთან დაკავშირებით პარტია “ქართული ოცნების” თავმჯდომარემ განაცხადა, რომ “ეს თუ მართალია, რაც თქვა გამოდის, რომ კონსტიტუცია დაურღვევია, მაგაში გავერკვევით“.
