ფრაქცია პარტია ,,ერთანი ნაციონალური მოძრაობის“ პოლიტსაბჭოს წევრი გიორგი ბოტკოველი სპეციალურ ბრიფინგზე აცხადებს, რომ რეგიონებსა და რაიონებში პარტიის ოფისში იფუნქციონირებს ჰუმანიტარული დახმარების ცენტრები:
,,უკრაინაში ადამიანებს ფაქტიურად არ აქვთ საშუალება შეიძინონ პროდუქტი და პირველადი საჭიროების ნივთები, რომლებიც სჭირდებათ მათ ყოველდღიურ არსებობას. ძალიან ბევრი ბავშვი დღეს თავშესაფარში ათენებს ღამეებს.
ჩვენ, საქართველოს მოსახლეობას განსაკუთრებული პასუხისმგებლობა და ვალდებულება გვაქვს ამ ყველაფერთან დაკავშირებით.
მე დარწმუნებული ვარ და ყოველდღიურად ვხედავთ, რამდენად მტკივნეულია თითოეული ქართველისთვის, ამ ქვეყანაში მაცხოვრებელი ადამიანისთვის ის, რაც დღეს ხდება უკრაინაში; ის აგრესია, რომელსაც აწარმოებს სისხლიანი პუტინის რეჟიმი და ამ ყველაფერში ჩვენი თანადგომა სჭირდება უკრაინელ ხალხს.
ამ დღეების განმავლობაში ძალიან ბევრი ადამიანი გვიკავშირდება როგორც რეგიონებში, ისე თბილისში და ადამიანებს აქვთ სურვილი თავისი მცირედი წვლილი შეიტანონ იმაში, რომ იქ მყოფ გაჭირვებულ, ომის პირობებში მყოფ მოსახლეობას როგორმე მაინც შეუმსუბუქონ ის პრობლემები, რის წინაშეც აღმოჩნდა უკრაინის მოსახლეობა.
ჩვენ რამდენიმე დღის წინ უკვე დავიწყეთ სხვა და სხვა რეგიონში/რაიონში, ამ შემთხვევაში – თელავში, მესტიაში, წყალტუბოში, სამტრედიაში, ხობში, სხვადასხვა მუნიციპალიტეტში გავხსენით ჰუმანიტარული დახმარების მიმღები პუნქტები ჩვენს ოფისებში, სადაც ადამიანები მოდიან, მოაქვთ პროდუქტები, პირველადი დახმარების ნივთები, ტანისამოსი, მედიკამენტები…
საქართველოს ყველა რეგიონში და რაიონში ფუნქციონირებს და იფუნქციონირებს შტაბები ,,ნაციონალური მოძრაობის“ ოფისებში, სადაც თქვენ გექნებათ საშუალება მოგვაწოდოთ ყველა ის ნივთი, რომელსაც თქვენ თვლით, რომ დღეს სჭირდება უკრაინის გაჭირვებულ, ომში მყოფ მოსახლეობას. ეს არის პირველ რიგში ბავშვთა კვება, რომელიც დღეს ძალიან უჭირს უკრაინის მოსახლეობას, ასევე მედიკამენტები და სხვა“, – განაცხადა გიორგი ბოტკოველმა.
ავტორი
ნინი ხიჯაკაძე
