საპარლამენტო უმრავლესობის წევრის, თამარ ტალიაშვილის განცხადებით ყველაზე ძალიან რაც გაეხარდება რუსეთს არის ის, რომ ნახოს საქართველო კრიტიკულ მომენტში გახლეჩილი.
„პრაქტიკულად, მერამდენე დღეა მეც, როგორც ერთ-ერთი რიგითი მოქალაქე ღამეებს ვათენებ, რადგან ჩემი უკრაინელი მეგობრები მწერენ სარდაფიდან, თავშესაფრიდან, რომ „რამდენიმე წუთის წინ აფეთქდა ჭურვი“, „ახლა ვიბრძვით“ და ა.შ. – ეს ყველაფერი ადამიანურად უმძიმესი გადასატანია“ – ასე გამოეხმაურა უკრაინის თემას თამარ ტალიაშვილი განთლებისა და მეცნიერების კომიტეტის სხდომაზე.
„რაც შეეხება საქმეს, ჩვენ დღის წესრიგში გვქონდა საკითხი ,,სახელმწიფო სიმბოლოების გამოყენების წესის შესახებ“ საქართველოს კანონში ცვლილების შეტანის თაობაზე“, რომელიც შეეხება დროშის აღმართვას სასწავლო დაწესებულებებში, ამასთან დაკავშირებით მახსოვს გასულ კვირას იყოს გარკვეული დებატები, ასევე მახსოვს რამდენიმე წლის წინ სავალდებულო სამხედრო სამსახურის შესახებ, რეზერვისტების ძლიერი, დიდი, საყოველთაო, ტოტალური თავდაცვის პრინციპებით უდიდესი რეზერვის შექმნის შესახებ გამართული დებატები.
მიხარია, რომ სწორედ ასეთ მძიმე წუთებში ვაახლოებთ ჩვენ პოზიციებს.
ის კურსი, რაც ჩვენ გვაქვს აღებული, რომ საქართველოს თითოეული მოქალაქე იყოს ჩართული ქვეყნის სამსახურში, გრძნობდეს თავის სამშობლოს პატარა ასაკიდან, აი ამ მიმართულებით ჩვენ უნდა გავაგრძელოთ მუშაობა.
ყველაზე ძალიან, რაც გაეხარდება რუსეთს არის ის, რომ ნახოს ჩვენი ქვეყანა ამ კრიტიკულ მომენტში გახლეჩილი.
ჩვენ უნდა ვიყოთ კონცენტრირებული კონკრეტულ საკითხზე თუ როგორ გავაძლიეროთ თუნდაც განათლების მიმართულებით ეს თემა, მაგალითად, ბანაკებში დასასვენებელი თუ სარეაბილიტაციო შესაძლებლობები მივცეთ ჩვენს უკრაინელ ხალხს.
ასევე აღსანიშნავია ჩვენი დიპლომატიური სამსახური, ჩვენი საკონსულო ოდესაში და საელჩო კიევში, რომლებიც იქ არიან სრული შემადგენლობით და თავისი ოჯახებით და აკეთებენ ძალიან დიდ საქმეს“, – განაცხადა თამარ ტალიაშვილმა.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
