პარლამენტის რეგიონული პოლიტიკისა და თვითმმართველობის კომიტეტის თავმჯდომარე სოზარ სუბარი მწავე შეფასებას აკეთებს და კრიტიკას გამოთქვამს რადას დეპუტატის, ალექსეი გონჩარენკოს მიერ სოციალურ ქსელში გამოქვეყნებულ პოსტთან და მის პოზიციებთან დაკავშირებით:
,,ჩვენ ვართ ისეთ რეგიონში, სადაც ერთ მოუზომელ ნაბიჯს შეიძლება მოჰყვეს ღია აგრესია და ასეთ შემთხვევაში ჩვენ ნამდვილად ვერ ავყვებით პროვოკატორი პოლიტიკოსების განცხადებებს, როგორიც იყო უკრაინელი პოლიტიკოსი ბატონი გონჩარენკო, – როცა მოგვიწოდებს, რომ დაიძრან ტანკები ახლა ცხინვალისკენ და სოხუმისკენ.
ეს არის არა მხოლოდ უპასუხისმგებლო განცხადება, არამედ ეს არის ადამიანი, რომელზეც ძალიან სერიოზული ეჭვები და ინფორმაციები არსებობს თვითონ უკრაინაში, რომ ეს ადამიანი თანამშრომლობს რუსულ სპეც. სამსახურებთან. ამაში ბრალს სდებენ თვითონ უკრაინის რადას დეპუტატები. ამ ადამიანმა თავისი პოლიტიკური მოღვაწეობა დაიწყო სწორედ ეთნიკური რუსებისა და რუსულენოვანი ხალხის ინტერესების დაცვით უკრაინაში.
ასევე, ძალიან საეჭვოა, როცა ასეთი ადამიანის განცხადებებს ესე უაპელაციოდ აიტაცებენ ხოლმე ქართველი პოლიტიკოსები. ძალიან საინტერესოა მართლაც იგივე პროვოკაციული მიზნები ხომ არ ამოძრავებთ საქართველოს მიმართ, რაც ბატონ გონჩარენკოს?!“, – განაცხადა სოზარ სუბარმა.
ავტორი
ნინი ხიჯაკაძე
