საქართველოს პრემიერ-მინისტრი ირაკლი ღარიბაშვილი კომენტარს აკეთებს უკრაინის ტერიტორიაზე რუსეთის შეჭრთან და იქ მიმდინარე ომთან დაკავშირებით საერთაშორისო თანამეგობრობის მხრიდან მიღებულ გადაწყვეტილებებთან მიმართებაში. მმართველი პარტიის ლიდერი აცხადებს, რომ ეროვნული და ქართველი ხალხის ინტერესების გათვალისწინებით, საქართველო არ შეუერთდება რუსეთის მიმართ დაწესებულ ფინანსური და ეკონომიკური სანქციებს:
,,ომს არანაირი გამართლება არ აქვს. ჩვენ ეს ყველაფერი ჩვენს თავზე გამოვცადეთ 2008 წელს, როცა სამწუხაროდ, საუბედუროდ, თავიდან ვერ იქნა აცილებული 2008 წლის აგვისტოს ტრაგიკული მოვლენები.
ჩვენ, რა თქმა უნდა, გავეცანით ჩვენი საერთაშორისო პარტნიორების ქმედებებს, რომელიც მოჰყვა უკრაინაში საომარი მოქმედებების დაწყებას. მე ვგულისხმობ ეკონომიკურ და ფინანსურ სანქციებს. მინდა მკაფიოდ განვაცხადო და ერთმნიშნელოვნად, რომ საქართველო, ჩვენი ეროვნული და ჩვენი ხალხის ინტერესების გათვალისწინებით, არ აპირებს მონაწილეობა მიიღოს ფინანსურ და ეკონომიკურ სანქციებში.
უკრაინაში ჩასვლა, ჩასვლისთვის, არაფრის მომცემი არ არის, ეს ერთი. თქვენ თუ გინდათ იმის დემონსტრირება, რომ აი მაშინ იყო ჩამოსული… სოლიდარობა, როგორც ჩვენს ქვეყანას შეგვიძლია ისე, როგორც გამოვხატავთ და გამოვხატეთ და ამის თაობაზე მოგახსენეთ.
გუშინ მე მთელი დღის განმავლობაში უსაფრთხოების კაბინეტთან მქონდა განხილვა “ლაივ”-რეჟიმში, იმ ინფორმაციების შესახებ, რომელიც მოეწოდებოდა ჩვენს სამსახურებს და, რა თქმა უნდა, ეს არის ჩვენი ყოველდღიური მუშაობის შემადგენელი ნაწილი.
შესაბამისად უსაფრთხოების საბჭოს სხდომის გამართვა დღეს ამ ვითარებაში არანაირ საჭიროებას არ წარმოადგენს.
მე მაქვს ჩემი საქმე, პარლამენტს თავისი საქმე აქვს, ომი უკრაინაში მიმდინარეობს და ჩვენ, რა თქმა უნდა, დიდი შეშფოთებით და დიდი ყურადღებით ვაკვირდებით იქ განვითარებულ მოვლენებს”, – განაცხადა ირაკლი ღარიბაშვილი.
ავტორი
ნინი ხიჯაკაძე
