დღეს დილით, გამთენიისას რუსეთი უკრაინაში შეიჭრა და დაიწყო ფართომასშტაბიანი ომი. თავდასხმა ხორციელდება სხვადასხვა ტიპის შეიარაღების გამოყენებით, ისმის აფეთქებების ხმა. ქვეყნის მასშტაბით საომარი მდგომარეობა გამოცხადდა.
რუსეთის უკრაინაში შეჭრისთანავე ვიდეომიმართვა გაავრცელა უკრაინის პრეზიდენტმა ვოლოდიმირ ზელენსკიმ და მოქალაქეებს სახლში დარჩენისა და სიმშვიდის შენარჩუნებისკენ მოუწოდა:
“რუსეთის პრეზიდენტმა, პუტინმა დონბასში სპეციალური სამხედრო ოპერაციის ჩატარების შესახებ გამოაცხადა. რუსეთი თავს დაესხა ჩვენს ინფრასტრუქტურას, მესაზღვრეებს. ქვეყნის ბევრ ქალაქში ისმის აფეთქების ხმა.
უკრაინის მთელ ტერიტორიაზე საგანგებო მდგომარეობას ვაცხადებ.
დღეს თქვენგან, თითოეული თქვენგანისგან გვჭირდება სიმშვიდე. შეძლებისდაგვარად, დარჩით სახლში. ჩვენ ვმუშაობთ, არმია მუშაობს, მთელი უსაფრთხოების და თავდაცვის სექტორი მუშაობს. თქვენთან მუდმივად კავშირზე ვიქნებით – მე, ეროვნული უსაფრთხოებისა და თავდაცვის საბჭო, მინისტრთა კაბინეტი.
პანიკის გარეშე, ჩვენ ძლიერები ვართ, ყველაფრისთვის მზად ვართ და ყველას დავამარცხებთ, ჩვენ უკრაინა ვართ!
დიდება უკრაინას!” — განაცადა ვოლოდიმირ ზელენსკიმ.
