დღეს გაიმართა “ერთიანი ნაციონალური მოძრაობის” პოლიტსაბჭოს სხდომა, სადაც განხილული იყო ქვეყნის მე-3 პრეზიდენტის, მიხეილ სააკაშვილის ჯანმრთელობის მდგომარეობისა და მისი აუცილებელი მკურნალობი საკითხი. პოლიტსაბჭოს გადაწყვეტილება საზოგადოებას პარტიის თავმჯდომარე, ნიკა მელიამ გააცნო:
“პარტიის ცენტრალური საკითხი არის მიხეილ სააკაშვილის სიცოცხლის გადარჩენა. სახალხო დამცველის მიერ შექმნილი მედიკოსთა კონსილიუმი, ცენტრი “ემპათია”, უცხოელი ექიმები, საქართველოს მე-3 პრეზიდენტის პირადი ექიმი ერთხმად აღნიშნავენ, რომ მიხეილ სააკაშვილის ისედაც მძიმე ჯანმრთელობის მდგომარეობა, დღითიდღე მძიმდება და სამწუხაროდ არ ექვემდებარება საქართველოში განკურნებას.
აქედან გამომდინარე, მიხეილ სააკაშვილის გადარჩენის ერთადერთი გზა არის ის, რომ, შესაბამისი მკურნალობის მისაღებად, იგი უნდა იყოს გადაყვანილი ქვეყნის ფარგლებს გარეთ, სხვა ქვეყნის კლინიკაში.
ამიტომ, პარტიის ყველა აქტივობა დაუკავშირდება მიხეილ სააკაშვილის სიცოცხლის გადარჩენას. 5 მარტს, 5 საათზე ქვეყნის მოსახლეობის იმ ნაწილს, რომლებიც თვლიან, რომ ეს ისტორიული უსამართლობა უნდა დასრულდეს და ამ ბრძოლაში არიან, ველოდებით რუსთაველის გამზირზე“, – განაცხადა ნიკა მელიამ.
