დღეს გამართულ სასამართლო პროცესზე, სიტყვით გამოვიდა საქართველოს მე-3 პრეზიდენტი, მსჯავრდებული მიხეილ სააკაშვილი, რომელმაც უვადო შიმშილობის დაწყების თაობაზე გააკეთა განცხადება და ასევე, კონკრეტული გზავნილებით, მიმართა საზოგადოებას და ოპოზიციას:
“პუტინის დავალებით, არსებული კლეპტოკრატიული რეჟიმის და მაფიოზური კლანის მიერ შეგნებულად ხორციელდება ჩემი ინვალიდიზაცია – ამას ვაცხადებ სრული პასუხისმგებლობით.
აქედან გამომდინარე მე მინდა ვთქვა: თქვენ ვერ მიიღებთ იმას, რომ წყნარად ისე ჩავქრე, ვითომ არაფერი. თქვენ ნახავთ, თუ საჭირო გახდა, როგორ თავაწეულად კვდებიან ნამდვილი პრეზიდენტები და ნამდვილი ლიდერები.
მე დღეიდან ვაცხადებ უვადო სრულ შიმშილობას და ეს არის რეაქცია იმაზე, როგორც გვეპყრობა რეჟიმი მე და ჩემს ხალხს.
ნახოს ყველამ, რას ნიშნავს სამშობლოს სიყვარული.
მხოლოდ სულელებს შეუძლიათ დაიჯერონ ის ბრალდებები, რომელიც მე მაქვს წაყენებული. მინდა გითხრათ, რომ ჩალით არაა ეს ქვეყანა დახურული.
მინდა ვუთხრა ყველას ოპოზიციაში: მეგობრებო, გვერდზე გავწიოთ ყველა ამბიციები – სააკაშვილი ნუ გაკომპლექსებთ, ყველანი ერთად უნდა ვიყოთ, ყველანი მობილიზებული უნდა ვიყოთ. ჩვენ ყველანი ერთი მიმართულებით უნდა მივდიოდეთ, მართლა თუ გვინდა ცვლილება ამ ქვეყანაში,” – განაცხადა მიხეილ სააკაშვილმა.
