საპენსიო სესხის პროცენტის საკითხთან დაკავშირებით მთავრობის ადმინისტრაციაში შეხვედრა გაიმართა. კომისიის სხდომის დასრულების შემდეგ ცნობილი გახდა, რომ საპენსიო სესხის პროცენტის ზედა ზღვარი 25%-მდე დაიწევს.
როგორც შეხვედრის დასრულების შემდეგ „სტრატეგია აღმაშენებლის“ თავმჯდომარემ აღნიშნა, რომ ის დაპირება, რაც მისმა პარტიამ წინასაარჩევნო პერიოდში ამომრჩეველს მისცა ეტაპობრივად სრულდება. ვაშაძის თქმით ხელისუფლებამ, ამ ეტაპზე, არ გაიზიარა შეხედულება, რომ პენსიონერს ჰქონდეს თავისუფალი არჩევანის შესაძლებლობა საბანკო სექტორში საპენსიო მომსახურების არჩევის კუთხით:
„ჩვენმა ერთობლივმა ბრძოლამ შედეგი გამოიღო, საპენსიო სესხის პროცენტი 25-26%-მდე დაიწევს. მართალია ხელისუფლებამ არ გაიზიარა ჩვენი მეორე შეთავაზება, პენსიონერისთვის მომსახურე ბანკის თავისუფალი არჩევანის შესაძლებლობას, თუმცა ამ მიმართულებით, რა თქმა უნდა, „სტრატეგია აღმაშენებელი“ აგრძელებს ბრძოლას და იმედი გვაქვს თქვენთან ერთად ამ სამართლიანი მოთხოვნის შესრულებასაც მივაღწევთ.
პენსიონერების სესხის საკითხი ჩვენი გუნდისთვის არის ის ერთ-ერთი მთავარი დაპირება, რომელსაც წინასაარჩევნო პერიოდში „სტრატეგია აღმაშენებელი“ ამომრჩეველს პირდებოდა.
კარგია, რომ სხვა ოპოზიციონერმა კოლეგებმაც გაიზიარეს ეს პრობლემა და მისი მნიშვნელობა. „სტრატეგია აღმაშენებელი“ არის ის პასუხისმგებლიანი ძალა, რომელიც სიფრთხილით ეკიდება ყველა დაპირებას, მაგრამ დაპირების შემდეგ ყველაფერს აკეთებს მისი შესრულებისთვის. იმედი მაქვს ჩვენი ძალისხმევით ხალხისთვის მნიშვნელოვანი სხვა პრობლემური საკითხების მოგვარებასაც შევძლებთ“, – აღნიშნა გიორგი ვაშაძემ.
ცნობისთვის, „სტრატეგია აღმაშენებელმა“ პარლამენტში პირველმა დაარეგისტრირა კანონპროექტი საპენსიო სესხების საპროცენტო განაკვეთის დაწევის შესახებ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
