უფლებადამცველი ლაშა მესხი სოციალურ ქსელში გაძვირებული ფასების შესახებ წერილს აქვეყნებს:
“ლარი ხომ გამყარდა. რატომ არ იაფდება საწვავი?
ყოვლად უპასუხისმგებლო ბიზნესი ათასგვარ მიზეზს მოიფიქრებს, იმისთვის რომ “გააპრავოს” ეს ამბავი. ის, რომ თურმე ძველი ფასით აქვთ ნაყიდი, ის რომ თურმე სახელმწიფოს მხრიდან აქციზის ფასი ტვირთად აწევთ… ყველაფერი სხვისი ბრალია და გაქსუებული ბიზნესი, რომელიც წლებია ხალხის გაჭირვების ხარჯზე ხელებს ითბობს, ვითომ არაფერ შუაშია.
წლების მანძილზე რამდენიმე მსხვილი საწვავის კომპანია, რომ შეთანხმებულად მოქმედებს ამაზე ხმას რატომ არავინ იღებს?
ის, რომ 2015 წელს „კონკურენციის პირობების“ დარღვევისთვის მონოპოლისტი კომპანიები დაჯარიმდა, გახსოვთ?! თუმცა მსხვილმა კომპანიებმა 55 მილიონის ნაცვლად რატომღაც მხოლოდ 3 მილიონი გადაიხადეს…
ყველაფერი ეს არის გამოცხადებული, შეთანხმებული ომი ხალხის წინააღმდეგ.
და ამ რეალობაში ზოგიერთი ვაი პოლიტიკოსი და ექსპერტი ბიზნესისთვის შეღავათებს ითხოვს.
შეღავათი ბიზნესს კი არა ხალხს სჭირდება და ამ უთანასწორო ბრძოლაში სახელმწიფო უნდა დადგეს ხალხის მხარეს. ეს ეხება როგორც საწვავის ფასს, ისე მედიკამენტების, პროდუქტების და აშ.
სახელმწიფოსთვის ამოსავალი ადამიანი უნდა იყოს და არა ერთეულების ჯიბის გასქელების ხელშეწყობა“, – წერს ფეისბუქის საკუთარ გვერდზე ლაშა მესხი.
