“საქართველოს მხრიდან იდგმება ზუსტად ის ნაბიჯები, რომლებიც უნდა გადაიდგას” – გიორგი ხელაშვილი

უკრაინის წინააღმდეგ რუსეთის მოსალოდნელ აგრესიას და მადრიდში დაგეგმილ NATO-ს სამიტს ეხმაურება პარლამენტის საგარეო ურთიერთობათა კომიტეტის თავმდჯომარის პირველი მოადგილე გიორგი ხელაშვილი და აცხადებს, რომ სამიტისგან აქვს დიდი მოლოდინი, ,,მით უმეტეს, რომ რუსეთმა გამოიწვია ზუსტად იმის საპირისპირო, რაც უნდოდა – უფრო შეაკავშირა დასავლეთი“:

,,ძალიან ბევრი აქ დამოკიდებულია NATO-ზე – რა გადაწყვეტილებას მიიღებს, რამდენად ერთიანი ფრონტით გამოვა რუსეთის აგრესიის წინააღმდეგ. საქართველოს მხრიდან იდგმება ზუსტად ის ნაბიჯები, რომლებიც უნდა გადაიდგას.

ვემზადებით ასევე ,,ნატო“-ს მადრიდის სამიტისათვის, თუმცა იმედი გვაქვს, რომ ეს არ იქნება ერთ-ერთი რიგითი სამიტი, არამედ აქ შეიძლება თვითონ ,,ნატო“-ს შიგნით მოხდეს რაღაცა დადებითი გარდატეხა. ამის დიდი იმედი გვაქვს, მით უმეტეს, რომ რუსეთმა გამოიწვია ზუსტად იმის საპირისპირო, რაც უნდოდა – უფრო შეაკავშირა დასავლეთი.

ჩვენ ვართ ძალიან მჭიდრო კომუნიკაციაში, რა თქმა უნდა, უკრაინის ხელისუფლებასთან, როგორც ყოველთვის, მაგრამ ახლა განსაკუთრებით. ყველა იმ ნაბიჯს, რომელიც გადადგმული იქნება დასავლეთიდან უკრაინის დასახმარებლად, საქართველოს მთავრობა ადეკვატურად უპასუხებს.

გერმანიის საზღვაო ფლოტის ადმირალი, რომელიც გადადგა (ყირიმის საკითხთან დაკავშირებით უკრაინის ინტერესების საწინააღმდეგო პოზიციის დაფიქსირების გამო – რედ.) ამბობს, რომ საქართველო ფაქტობრივად მზად არის NATO-ს წევრობისათვის და აკლია მხოლოდ და მხოლოდ დასავლეთიდან ერთი ნაბიჯი – თანხმობა იმისთვის, რომ NATO-ში გაწევრიანდეს.

ეს იყო ძალიან სიპტომატური გამოსვლა მიუხედავად იმისა, რომ ეს გამოსვლა, სამწუხაროდ, გაჯერებული იყო რუსეთის მიმართ დამთმობი რიტორიკით, მაგრამ საქართველოსთან მიმართებაში ამ ადმირალსაც კი არ გამოუვიდა რაიმე კრიტიკული გამონათქვამი, არამედ მან მთლიანად აღიარა, რომ საქართველო მზად არის NATO-ს წევრობისათვის“, – განაცხადა გიორგი ხელაშვილმა.

ავტორი
ნინი ხიჯაკაძე