“ზუსტად ვიცი, თუ როგორ უნდა სამართლიანი არჩევნების ჩატარება და საარჩევნო ადმინისტრაციის მიმართ ნდობის გაზრდა” – თენგიზ თევზაძე

119

ცესკოს თავმჯდომარეობის კანდიდატი თენგიზ თევზაძე აცხადებს, რომ მონაწილეობის მიიღებს შესარჩევ კორკურსში, რადგან თვლის, რომ ზუსტად აქვს განსაზღვრული, თუ როგორ უნდა მოხდეს საარჩევნო ადმინისტრაციის სუბიექტური ჩარევის შეზღუდვა, სამართლიანი არჩევნების ჩატარება და საარჩევნო ადმინისტრაციის მიმართ ნდობის გაზრდა:

,,გადავწყვიტე, მივიღო მონაწილეობა ცესკოს თავმჯდომარეობის შესარჩევ კონკურსში.

ჩემი კონკურსში მონაწილეობის სურვილი გამომდინარეობს ჩემი სამეცნიერო, აკადემიური და პროფესიული გამოცდილებიდან: 2014 წლიდან სხვადასხვა უნივერსიტეტში ვასწავლი საარჩევნო სამართალს და გამოქვეყნებული მაქვს 15-მდე სამეცნიერო კვლევა, რომელთა ნაწილი შეეხება არჩევნებს და საარჩევნო პროცესის ანალიზს.

გარდა ამისა, ჩემს მეგობრებთან ერთად შევიმუშავე ინოვაციური სადამკვირვებლო კამპანიის პრინციპები, რომელიც სრულად არის დაფუძნებული მოხალისეობაზე და მაღალ სამოქალაქო პასუხისმგებლობაზე.

  • ზუსტად ვიცი, თუ როგორ უნდა მოხდეს საარჩევნო ადმინისტრაციის სუბიექტური ჩარევის შეზღუდვა, სამართლიანი არჩევნების ჩატარება და საარჩევნო ადმინისტრაციის მიმართ ნდობის გაზრდა.
  • ვთვლი, რომ ამ პროცესში ჩემი მონაწილეობა არის მნიშვნელოვანი, რადგანაც არ წარმოვადგენ არც რომელიმე პოლიტიკურ დაჯგუფებას და არც დღევანდელ საარჩევნო ადმინისტრაციას. ამავე დროს მაქვს არჩევნებზე დაკვირვების და დარღვევების აღრიცხვის დიდი გამოცდილება.

მოვუწოდებ სხვა კანდიდატებს (დღევანდელი საარჩევნო ადმინისტრაციის წევრებს) გავმართოთ საჯარო დისკუსია და წარვუდგინოთ საზოგადოებას საარჩევნო პროცესის და საარჩევნო ადმინისტრაციის შელახული რეპუტაციის გამოსწორების ჩვენეული ხედვები“, – წერს სოციალურ ქსელში თენგიზ თევზაძე.

ავტორი
ნინი ხიჯაკაძე

კომენტარები პუბლიკაციაზე