პარტია ,,ლელო – პარტნიორობა საქართველოსთვის“ თავმჯდომარე მამუკა ხაზარაძე სასამართოლო განაჩენის გამოცხადების შემდეგ აღნიშნავს, რომ ბრძოლა გაგრძელდება და სასამართლოს გადაწყვეტილებს გაასაჩივრებენ, რადგან ეს არის პრინციპის და ღირსების საკითხი:
,,ძალიან ნათელია ის სიყალბე, რომელიც ახლა ჩვენ მოვისმინეთ მოსამართლის პირით. ჩვენ გვედავებოდნენ 12 წლის წინანდელი, ხაზს ვუსვამ, 2008 წელს ვითომ და ფულის გათეთრების მუხლით და უცბად ეს მუხლი გაქრა. 2012 წელს თურმე ჩვენ თურმე თაღლითობა ჩაგვიტარებია, რომელზეც გამოძიებაც კი არ არის ჩატარებული. არ არის დადგენილი არც დაზარალებული, არც მომჩივანი – ეს არის ნონსენსი, ეს არის ის სასამართლო, რომლის დემონტაჟი უნდა მოვახდინოთ თითოეულმა ჩვენგანმა და მთელმა საზოგადოებამ.
ასეთი სასამართლოს, სამართლიანობის პირობებში ჩვენი ქვეყანა წინ ვერ წავა. ეს არის 1 კაცის მიერ მართული სასამართლო მართლმსაჯულება. გუშინაც ვუთხარი, დღესაც ვიმეორებ, რომ ეს მმართველობა ამ ქვეყანაში მისი ხელმძღვანელობით, ბიძინა ივანიშვილს მივმართავ პირადად, დამთავრდება იმიტომ, რომ ქართველი ხალხი ვერ შეეგუება ასეთ უსამართლო მართლმსაჯულებას ამ ქვეყანაში. სადაც არ არის სამართალი იქ არ არის მშვიდობა. ამ ქვეყანაში არ იქნება მშვიდობა მანამდე, სანამ თითოეულ მოქალაქეს არ ექნება იმის განცდა, რომ მის უფლებებს, ღირსებას იცავს დამოუკიდებელი, მიუკერძოებელი სასამართლო.
ეს სამწლიანი „მასკარადი“, თურმე ჩვენ გვაბრალებდნენ 12 წლის წინათ ფულის გათეთრებას და ახლა თურმე აღმოჩნდა, რომ 4 წლის შემდეგ ჩვენ რაღაცა ჩაგვიდენია. რატომ არ დაიწყო ამაზე გამოძიება? რატომ არ მოხდა იმ ადამიანების დაკითხვა, ვინც თუნდაც 2012 წელს შეიძლება რაღაცაში მონაწილეობდა?
ეს არის ფარსი და კიდევ ერთხელ ვადასტურებ, რომ ბრძოლა გაგრძელდება, ჩვენ ამას გავასაჩივრებთ. მიუხედავად იმისა, რომ ჩვენ ახლა საპყრობილეში არ მივდივართ, ჩვენ ამას გავასაჩივრებთ. ეს არის პრინციპის, ღირსების საკითხი. ეს არის იმ ადამიანებისთვის იმედის დაბრუნების საკითხი, რომელსაც ცოტაოდენი იმედი დარჩა იმისათვის, რომ ამ ქვეყანას აქვს შანსი იყოს გამარჯვებული.
მე გპირდებით, მთელ ჩემს თანაგუნდელებთან ერთად, გავაგრძელებ ბრძოლას ამ ქვეყნის საუკეთესო მომავლისთვის. ამ ქვეყანას აქვს უზარმაზარი პერსპექტივა და ეს უზარმაზარი პერსპექტივა არის თითოეულ თქვენგანში, მაგრამ დახშული, მიმალული, შეშინებული. ეს უნდა გამოვაღვიძოთ და გავაერთიანოთ. დავივიწყოთ მტრობა, უნდა გავერთიანდეთ ჩვენი სამშობლოს გარშემო, ამ ქვეყანაში ერთხელ და სამუდამოდ საქართველო უნდა გავხადოთ წარმატებული, გამარჯვებული ქვეყანა!“, – განაცხადა მამუკა ხაზარაძემ.
ავტორი
ნინი ხიჯაკაძე
