“სახელმწიფო ზრუნავს პატიმრის ჯანმრთელობაზე და იმაზე, რომ მიხეილ სააკაშვილის ჯანმრთელობას და სიცოცხლეს საფრთხე არ შეექმნას” – ირაკლი ქადაგიშვილი

საპროცედურო საკითხთა და წესების კომიტეტის თავმჯდომარემ, პარტია “ქართული ოცნების” ერთ-ერთმა ლიდერმა ირაკლი ქადაგიშვილმა კომენტარი გააკეთა საქართველოს მე-3 პრეზიდენტის ჯანმრთელობის მდგომარეობასთან დაკავშირებით და აღნიშნა, რომ პენიტენციური სამსახური და სახელმწიფო ზრუნავს, რათა პატიმრის ჯანმრთელობას და სიცოცხლეს საფრთხე არ შეექმნას:

,,საერთოდ, ეს არის ოპოზიციური პარტიის და რაღაც გარკვეული ჯგუფის, იმ ექიმების პოზიცია, რომლებიც როგორც ჩანს, უფრო მეტად არიან პოლიტიკურად ანგაჟირებულები და რომელთა მიზანიც არის გაცხადებული, რომ წარმოადგინონ მიხეილ სააკაშვილის ჯანმრთელობის მდგომარეობა ისეთად, რომ ის არის მომაკვდავ მდგომარეობაში.

მათი განცხადებები ურთიერთსაწინააღმდეგოა – ხან ეკონომიკურ პროგრამაზე ძალიან ენერგიულად მუშაობსო, ხან ამბობენ რომ საერთოდ აზროვნება და გადაადგილება უჭირს.

პენიტენციური სამსახური და სახელმწიფო ზოგადად ზრუნავს პატიმრის ჯანმრთელობაზე და იმაზე, რომ მის ჯანმრთელობას და სიცოცხლეს საფრთხე არ შეექმნას“, – განაცხადა ირაკლი ქადაგიშვილმა.

ავტორი
ნინი ხიჯაკაძე