პარლამენტის უმრავლესობის წევრმა ირაკლი ზარქუამ კომენტარი გააკეთა UNESCO-ს მიერ მიღებულ გადაწყვეტილებაზე, რომლის მიხედვითაც ტელეკომპანია ,,პირველის“ ოპერატორი ლექსო ლაშქარავა შეიყვანილი იქნა 2021 წელს მოკლული ჟურნალისტების სიაში:
,,5 ივლისს კი არ გარდაცვლილა ბატონი ლაშქარავა, როგორც იქ წერია*, არამედ 11 ივლისს. ესეც მიუთითებს, რომ შეცდომა არის და არასწორი ინტერპრეტაცია გაკეთდა.
UNESCO-ს ეს მონაცემები, რბილად რომ ვთქვათ, არის არაადეკვატური, შეცდომაშია შესული. იმიტომ, რომ გარდაცვალების მიზეზებზე გამოძიებამ დაადგინა და მათ შორის ოჯახის წევრებსაც, რამდენადაც ვიცი, თანხმობა აქვს მიცემული.
ასე, რომ არავის არ მისცეთ ინტერპრეტაციის საშუალება. ის რაც მოხდა იყო ტრაგედია! კიდევ ერთხელ ვამბობ, მიუღებელია ძალადობა, თუმცა გარდაცვალება რომ მიაწეროთ პირდაპირ – ეს არასწორია და გამოძიებამაც ამას პასუხი გასცა.
ყველა, ვინც ხელყო თავისუფალი მედიის მუშაობა, ვინც იძალადა – ყველა იქნება დასჯილი!
თქვენ იცით, რომ მიდის გამოძიება და რამდენიმე ადამიანი დაჭერილიც არის“, – განაცხადა ირაკლი ზარქუამ.
შეგახსენებთ, რომ ლექსო ლაშქარა 5 ივლისის მიმდინარე საპროტესტო აქციაზე სასტიკად იქნა ნაცემი. ტვ ,,პირველის“ ოპერატორი 11 ივლისს გარდაიცვალა.
* – თავდაპირველად, UNESCO-ს მიერ გამოქვეყნებულ ინფორმაციაში გარდაცვალების თარიღად მითითებული იყო 05/07/2021, რაც შემდგომში ჩასწორდა.
ავტორი
ნინი ხიჯაკაძე
